Dy vëllezër, Tiego Beckles (20 vjeç) dhe Richard Beckles (19 vjeç), janë shpallur në kërkim nga policia britanike për vrasjen e Trey Johnson, një 30-vjeçari baba i dy fëmijëve, gjatë natës së Krishtlindjes. Ngjarja e rëndë ndodhi rreth orës 3:30 të mëngjesit më 25 dhjetor, kur Johnson u gjet me plagë të rënda nga thika dhe shpallet i vdekur në vendngjarje.
Familja e tij, duke e kujtuar, e ka përshkruar si një “vëlla dhe baba të dashur, partner të përkushtuar dhe një njeri me shpirt të kujdesshëm”, duke theksuar se ai ishte gjithmonë i gatshëm për të ndihmuar të tjerët dhe se buzëqeshja dhe energjia e tij ndriçonin çdo ambient. Ata e përshkruan Johnson si një baba të përkushtuar që jetonte për familjen e tij.
Policia e West Midlands ka bërë publike emrat e dy vëllezërve dhe ka kërkuar ndihmën e dëshmitarëve për zbardhjen e rrethanave të ngjarjes. Hetuesit po shqyrtojnë pamjet e kamerave të sigurisë si pjesë e hetimeve. Gjatë procesit fillestar ishin arrestuar dy burra të moshës 35 dhe 58 vjeç, të cilët u liruan më pas pa akuza. Një grua gjithashtu u ndalua nën dyshimin për ndihmë ndaj një personi të kërkuar, por u lirua me kusht.
Autoritetet kanë bërë thirrje për dorëzimin e dy vëllezërve, duke deklaruar se ata e dinë se janë të kërkuar dhe se është më mirë që të dorëzohen para se të kapen. Policia paralajmëroi se kushdo që ndihmon Tiego dhe Richard Beckles do të përballet me pasoja ligjore. Dëshmitarët janë inkurajuar të ofrojnë çfarëdo informacioni, pavarësisht se sa i vogël mund t’u duket, me garancinë që informacioni do të trajtohet në konfidencialitet të plotë.
