Presidenti ukrainas, Volodymyr Zelensky, ka hedhur poshtë akuzat e Rusisë për një sulm me dron ndaj rezidencës së Presidentit Vladimir Putin. Ai ka përshkruar këto pretendime si një përpjekje të Moskës për të minuar bisedimet për paqe.
Ministri i Jashtëm rus, Sergei Lavrov, njoftoi se Ukraina kishte dërguar 91 mjete ajrore pa pilot drejt rezidencës së Putinit në regjionin e Novgorodit. Ai tha se të gjitha dronët ishin interceptuar dhe asgjësuar nga sistemet ruse të mbrojtjes ajrore, pa shkaktuar viktima apo dëme.
Zelensky i cilësoi këto akuzat si “gënjeshtra tipike ruse” dhe theksoi se Rusia po përpiqet t’i japë një justifikim Kremlinit për të vazhduar sulmet ndaj Ukrainës. Ai kujtoi se Rusia ka shënjestruar më parë ndërtesa qeveritare në Kiev, duke treguar se është e rëndësishme që bota të mos heshtë për këtë situatë. “Nuk mund ta lejojmë Rusinë të minojë punën për arritjen e një paqeje të qëndrueshme,” shkroi ai në platformën X.
Nga ana tjetër, Rusia njoftoi se do të rishikonte qëndrimin e saj në negociatat e paqes, duke akuzuar Kievin për “terrorizëm shtetëror”. Megjithatë, Lavrov përsëriti se Moska nuk ka ndërmend të heqë dorë nga procesi i negociatave me Shtetet e Bashkuara.
Ky zhvillim paraqet tensione të reja në marrëdhëniet midis Ukrainës dhe Rusisë dhe tregon se përpjekjet për arritjen e një paqeje të qëndrueshme vazhdojnë të përballen me pengesa të mëdha.
