Ish-zonja e parë e Koresë së Jugut, Kim Geun-hee, është akuzuar për pranim ryshfeti dhe ndërhyrje në punët e shtetit. Prokurorët kanë zbuluar se ajo ka marrë mallra luksoze, përfshirë art, bizhuteri dhe çanta dore, me vlerë mbi 200,000 dollarë. Gruaja e ish-presidentit Yoon Seok-gyeol, e arrestuar në gusht, përballet me një sërë akuzash si manipulimi i tregut të aksioneve, korrupsion pasiv dhe shkelje të ligjit zgjedhor.
Pas një hetimi gjashtëmujor, prokurori Min Joong-gi njoftoi se institucione të rëndësishme të vendit ishin tronditur nga abuzimet e Kim. Prokurorët kanë deklaruar se ajo ka ndërhyrë në mënyrë të paligjshme në punët e shtetit “larg syrit të publikut”. Kim akuzohet se ka marrë rreth 377.25 milion won (223,000 euro) në ryshfete nga biznesmenë dhe politikanë, duke përfshirë një pikturë nga Lee Woo-fan dhe çanta luksoze nga marka Chanel.
Ish-presidenti Yoon mohoi çdo njohuri lidhur me transaksionet. Në fillim të dhjetorit, prokurorët kërkuan një dënim prej 15 vjetësh burg dhe një gjobë prej dy miliardë wonësh (rreth 1.4 milion dollarë), duke e akuzuar Kim për veprime që e vendosnin atë “mbi ligjin” dhe për bashkëpunim me një organizatë fetare, çka vihet në pikëpyetje me ndarjen e fesë nga shteti, e sanksionuar në kushtetutë.
Kim Geun-hee i ka mohuar akuzat, duke i quajtur ato “thellësisht të padrejta”. Ish-presidenti Yoon shpalli gjendjen e jashtëzakonshme për një periudhë të shkurtër në dhjetor 2024, duke kontribuar në një krizë politike. Ai gjithashtu u shkarkua nga detyra pasi u shpall fajtor për kryengritje, një akuzë që e mohoi. Kjo përbën herën e parë në histori që një ish-president dhe gruaja e tij arrestohen të dy për akuza të ndara penale. Një gjykatë do të shpallë vendimin për rastin e znj. Kim më 28 janar.
