John Terry është një nga emrat që po përmendet për postin e trajnerit të Oxford United, klub në Championship. Ish-kapiteni i Anglisë dhe legjenda e Chelseat është në listën e kandidatëve për të zëvendësuar Gary Rowett, i cili u shkarkua dy ditë para Krishtlindjeve.
Terry, në moshën 45-vjeçare, dëshiron të fillojë një karrierë si trajner kryesor, dhe drejtimi i Oxford United mund të përfaqësojë hapin e madh që ai ka pritur. Ndërkohë, ai ka qenë i angazhuar së fundmi me ekipin 26ers në Baller League, por ambiciet e tij mbeten të orientuara drejt futbollit profesionist.
Një nga emrat tjetër të fortë për këtë post është Michael Beale, ish-trajner i Rangers dhe QPR, i cili është ndër favoritët për postin. Sidoqoftë, Terry është vlerësuar seriozisht nga pronarët e klubit dhe është përmendur edhe në të kaluarën për këtë mundësi. Ai kishte pasur një intervistë për këtë post më herët, kur klubi vendosi të angazhojë Des Buckingham, që udhëhoqi Oxfordin në ngjitjen nga League One pas një fitoreje në finalen e “play-off”-it ndaj Bolton Wanderers. Pas shkarkimit të Buckingham, Gary Rowett u thirr për të shpëtuar sezonin, por aventura e tij ishte e shkurtër.
Situata te Oxford United u përkeqësua kur programet zyrtare të ndeshjes së Boxing Day kundër Southampton u shtypën me mesazhin e Rowett, pavarësisht se ai kishte humbur postin. Megjithatë, ekipi reagoi pozitivisht në fushë. Nën drejtimin e trajnerit të përkohshëm Craig Short, Oxford United arriti një fitore 2-1 ndaj Southampton, duke dalë nga zona e rënies. Tyler Goodrham shënoi herët në ndeshje, ndërsa goli vendimtar erdhi nga Stanley Mills në minutën e 89-të.
Vendimi për emrin e ri të trajnerit pritet në ditët në vijim, me John Terry që mbetet një opsion i rëndësishëm për drejtuesit e Oxford United në këtë moment delikat të sezonit.
