Një ngjarje tragjike ka ndodhur në botën e futbollit, ku Fernando Martin, trajner i ekipit Valencia CF Femenino B, ka humbur jetën bashkë me tre fëmijët e tij pas fundosjes së një varke turistike në brigjet e Indonezisë. Sipas autoriteteve lokale, anija u përball me dallgë të larta, rreth 3 metra, dhe u mbyt pranë destinacionit të njohur turistik, Labuan Bajo. Nga 14 personat që ndodheshin në bord, shtatë prej tyre u shpëtuan, përfshirë katër anëtarë të ekuipazhit dhe një guidë turistike.
Në mesin e të mbijetuarve janë bashkëshortja e trajnerit, Andrea, si dhe vajza e tyre shtatëvjeçare, Mar. Ekipet e emergjencës vazhdojnë kërkimet për trupat e Fernando Martinit dhe të fëmijëve të tij. Klubi i Valencias ka reaguar përmes një njoftimi zyrtar, ku shpreh dhimbjen e madhe për humbjen e trajnerit dhe tre fëmijëve të tij, dhe ofron ngushëllime për familjen dhe miqtë e tij.
Pamje nga Agjencia Kombëtare e Kërkim-Shpëtimit tregojnë punonjësit e emergjencës duke ndihmuar të mbijetuarit për të dalë në breg, ndërsa autoritetet kanë mbyllur ishullin Padar për turistët për shkak të kushteve të këqija të motit. Aksidentet detare në Indonezi janë të zakonshme, shpesh për shkak të motit të keq dhe standardeve të ulëta të sigurisë. Kjo tragjedi së fundmi ka rizgjuar shqetësimet rreth sigurisë së transportit detar në zonat turistike të vendit.
