Opozita e sheh nismën e qeverisë për vendosjen e filtrave mbrojtëse ndaj investimeve të huaja si një veprim të vonuar dhe propagandistik. Jorida Tabaku, deputete demokrate, thekson se Shqipëria ka nevojë për një kornizë ligjore të fortë që do të jetë transparente dhe në përputhje me standardet ndërkombëtare, duke përfshirë ato amerikane dhe europiane.
Në një intervistë për Top Channel, Tabaku shprehu shqetësime mbi mënyrën se si qeveria po i qaset investimeve të huaja, duke i lënë jashtë vëmendjes disa sektorë kritike si infrastruktura, energjia dhe të dhënat sensitive. Ajo theksoi se analiza e investimeve të huaja është një detyrë e rëndësishme që përfshin edhe procesin e integrimit në Bashkimin Evropian. Sipas saj, qeveria shqiptare planifikon që fillimisht të aplikojë këto filtra në media dhe më pas në sektorë të tjerë, por interesi i partnerëve strategjikë përfshin fushat kritike.
Projekti i qeverisë parashikon që “Vettingu” i investimeve të huaja të menaxhohet nga një komitet ndërministror, megjithatë Tabaku beson se ky mekanizëm nuk garanton një kontroll të balancuar nëse nuk përfshin Parlamentin. Ajo sugjeron krijimin e një grupi të veçantë në Parlament, për të siguruar një sistem kontrolli më të fortë, përmes bashkëpunimit mes komisioneve të ngjashme. Tabaku gjithashtu shpreh shqetësim se të dhënat personale të shqiptarëve, veçanërisht ato të fundit nga Agjencia Kombëtare e Shërbimeve të Informacionit, mund të përdoren për qëllime kriminale.
Sipas saj, për të garantuar një proces të sigurt dhe të përgjegjshëm, qeveria duhet të publikojë analizat e investimeve dhe të jetë e qartë në lidhje me filtrat që do të aplikohen, sidomos në sektorët ku ka monopole. Kjo do ta ndihmonte Shqipërinë të konfirmojë prejardhjen e investimeve dhe të sigurojë transparencën e duhur.
Në përfundim, Tabaku i bën thirrje qeverisë që të angazhohet seriozisht për këtë çështje, duke shmangur veprimet që kanë si qëllim vetëm kalimin e detyrimeve formale.
