Fondi i Sigurimit të Detyrueshëm të Kujdesit Shëndetësor ka njoftuar zgjidhjen e kontratës me rreth 360 farmacitë që ofrojnë barna me rimbursim për pacientët, duke argumentuar se disa prej tyre kanë përdorur fatura fiktive për gati 10 barna. Urdhri i Farmacistëve ka reaguar ndaj këtij vendimi, duke e cilësuar si një dënim massiv dhe pa prova, që rrezikon seriozisht furnizimin e pacientëve me barna dhe stabilitetin e sistemit farmaceutik.
Në një procesverbal të dërguar farmacive, theksohet se ky veprim është realizuar pa afat dhe është hartuar në mënyrë të njëanshme, pa respektuar rregulloret e kontrollit. Urdhri e konsideron të pabazuar pretendimin për faturat fiktive, duke sqaruar se farmacitë furnizohen vetëm nga importues dhe shpërndarës të kontraktuar me Fondin. Faturat e lëshuara nga depoja, të regjistruara në sistemin e-depo, nuk mund të jenë fiktive sipas tyre, pasi ky sistem nuk lejon lëshimin e faturave në mungesë të gjendjes së mallit në depo.
Po ashtu, Urdhri argumenton se farmacitë nuk kanë kompetencë për të verifikuar gjendjen fizike të barnave në depo, një përgjegjësi kjo e Fondit dhe strukturave të tij kontrolluese. Sipas Urdhrit, ky dënim kolektiv krijon precedent të rrezikshëm për marrëdhëniet mes Fondit dhe farmacive.
Shumica e farmacive që kanë marrë njoftime për ndalimin kanë kaluar kontroll nga Drejtoritë Rajonale dhe vetë Fondi, pa u gjetur shkelje. Urdhri kërkon ndërprerjen e çdo procedure që mund të çojë në kolapsin e furnizimit me barna rimbursuese, për shkak të penalizimeve masive.
Në përfundim, Urdhri i Farmacistëve shpreh kundërshtimin ndaj abuzimeve dhe kërkon ndërhyrjen e Ministrisë së Shëndetësisë për zgjidhjen e këtyre problemeve, duke insistuar që çdo veprim duhet të respektojë ligjin dhe të mos cenojë profesionin e farmacistëve dhe interesin publik.
