Gjithnjë e më shumë pensionistë italianë po e lënë vendin e tyre për të gjetur një jetë më të përballueshme në Shqipëri, veçanërisht në qytetin e Durrësit. Kjo tendencë është theksuar nga korrespondentja e emisionit italian “È sempre Cartabianca” në Tgcom.24, e cila ka intervistuar disa pensionistë që tashmë jetojnë në bregdetin shqiptar.
Carmine Iampietro, një pensionist 75-vjeçar, e përshkruan Shqipërinë si një “parajsë të vogël”. Ai ka kaluar 48 vite në punë dhe tani dëshiron të shijojë pjesën e fundit të jetës së tij në kushte më të mira. Iampietro ka themeluar një shoqatë për t’i ndihmuar pensionistët e tjerë italianë të bëjnë të njëjtën zgjedhje.
Po ashtu, Massimo nga Bolonja, i cili më parë kishte provuar të jetonte në Portugali, shprehet se në Shqipëri ka gjetur qetësi dhe siguri, ndryshe nga përvoja e tij në Portugali. “Po kërkoja një vend të qetë dhe të ngrohtë për pleqërinë time, por atje nuk ndihesha i sigurt,” tha ai.
Një histori e ngjashme rrëfehet edhe nga Giuseppe, i cili kishte jetuar më parë në Ishujt Kanarie. Ai thekson se çmimet në atë zonë ishin rritur ndjeshëm dhe mbijetesa ishte bërë e vështirë. “Këtu, me më pak se 300 euro në muaj, mund të marrësh me qira një apartament prej 80 metrash katrorë,” deklaroi Giuseppe.
Ky fenomen i emigrimit të pensionistëve italianë në Shqipëri, i motivuar nga kostoja e ulët e jetesës dhe klima e favorshme, tregon një tendencë në rritje që pritet të vazhdojë, duke u bërë një alternativë atraktive për ata që kërkojnë kushte më të mira jetese pas përfundimit të karrierës së tyre.
