Një zjarr i fuqishëm, i shoqëruar nga shpërthime, ka shkatërruar Qendrën e Shëndetit dhe Rehabilitimit në Bristol Township, afër Filadelfias. Autoritetet dyshojnë se shkaku i incidentit mund të ketë qenë një rrjedhje gazi. Zjarrfikësit dhe stafi i emergjencës punuan me efikasitet për të evakuuar të moshuarit, duke përdorur dritaret dhe shkallët për t’i nxjerrë ata nga ndërtesa e dëmtuar.
Guvernatori i Pensilvanisë, Josh Shapiro, lajmëroi se dy persona kanë humbur jetën dhe pesë të tjerë mund të jenë të zhdukur. Numri i të plagosurve ende nuk është saktësuar, pasi shumë pacientë janë dërguar në spitale të ndryshme. Shefi i zjarrfikësve, Kevin Dippolito, e përshkroi shpërthimin si “shumë katastrofik,” duke nënvizuar se një shpërthim tjetër ndodhi vetëm 15-30 sekonda pas evakuimit të ekipit të zjarrfikësve, rrezikuar kështu jetët e ekipeve të shpëtimit.
Përveç dëmeve të shkaktuar nga zjarri, pjesa e poshtme e ndërtesës pësoi një shembje të pjesshme. Dippolito përshkroi skena heroike, ku fqinjët dhe oficerët e policisë ndihmuan në shpëtimin e njerëzve nga dritaret, duke mbajtur disa individë mbi supe për t’i dërguar në siguri. Në këtë situatë emergjente, shkolla e Mesme Harry S. Truman është shndërruar në qendër strehimi.
Ekipet e emergjencës arritën të identifikonin burimin e rrjedhjes së gazit në bodrum, duke parandaluar kështu përhapjen e tij më tutje në ndërtesë. Guvernatori Shapiro vlerësoi reagimin e ekipit të emergjencës si heroik dhe theksoi profesionalizmin e tyre. Qendra e Shëndetit kishte ndërruar pronësinë disa javë më parë, dhe Departamenti i Shëndetësisë së Pensilvanisë ishte duke zhvilluar një plan për të përmirësuar standardet e sigurisë.
Hetimet për shkakun e shpërthimit dhe për të zhdukurit vazhdojnë. Autoritetet lokale dhe kompanitë e shërbimeve po punojnë së bashku për të ndriçuar situatën dhe për të siguruar që të tilla incidente të mos ndodhin më në të ardhmen.
