Asambleja Kombëtare e Venezuelës ka miratuar të martën një ligj që parashikon dënime deri në 20 vite burg për ata që promovojnë ose financojnë piraterinë. Ky ligj, i quajtur “Për Garantimin e Lirisë së Lundrimit dhe Tregtisë Kundër Piraterisë, Bllokadave dhe Akteve të Tjera Ndërkombëtare të Paligjshme”, u miratua unanimisht si një përgjigje ndaj veprimeve të fundit të SHBA-ve kundër eksporteve të naftës venezueliane.
Ligji u prezantua nga ligjvënësi pro-qeveritar Giuseppe Alessandrello dhe përfshin “krime të tjera ndërkombëtare” me qëllim mbrojtjen e sovranitetit të Venezuelës dhe hapjes së rrugëve tregtare detare. Presidenti i Asamblesë, Jorge Rodriguez, deklaroi se projektligji do t’i dërgohet ekzekutivit për miratim dhe do të hyjë në fuqi menjëherë pas publikimit në Gazetën Zyrtare.
Ky veprim ndodhet në një kontekst të tensionuar mes Venezuelës dhe SHBA-së. Sipas autoriteteve amerikane, Roja Bregdetare e SHBA-së ka sekuestrojë një tanker të sanksionuar që transportonte naftë brutë venezueliane dhe ka përndjekur edhe dy anije të tjera. Uashingtoni pretendon se operacionet përfshijnë përpjekjet për të luftuar shmangien e sanksioneve dhe trafikimin e drogës.
Nga ana tjetër, Presidenti Nicolas Maduro ka akuzuar SHBA-në se po përpiqet të minojë ekonominë e vendit dhe t’i japë fund pushtetit të tij. Ai e ka quajtur ligjin e ri një mjet për mbrojtjen e të drejtave të Venezuelës dhe ndëshkimin e veprimeve që përbëjnë kërcënim për sigurinë kombëtare.
Analistët e politikës ndërkombëtare parashikojnë se ligji mund të intensifikojë tensionet dhe përplasjet mes Venezuelës dhe SHBA-së, duke e thelluar krizën në industrinë e naftës dhe sigurinë detare. Kjo situatë tregon se marrëdhëniet mes dy vendeve janë në një pikë të ndjeshme, pas një periudhe të gjatë tensioni dhe përballjesh diplomatike.
