Sipas dokumenteve të fluturimeve, presidenti amerikan Donald Trump ka udhëtuar së paku tetë herë me avionin privat të Jeffrey Epstein nga viti 1993 deri në 1996. Informacioni u publikua në një email të datës 8 janar 2020, i dërguar nga një ndihmës prokuror federal i Distriktit Jugor të Nju Jorkut, ku thuhet se Trump kishte marrë pjesë në disa fluturime më shumë nga sa ishte raportuar më parë.
Në të paktën katër nga këto fluturime ndodhej gjithashtu Ghislaine Maxwell. Dokumentet tregojnë se në një fluturim të vitit 1993, vetëm Trump dhe Epstein ishin pasagjerë, ndërsa në një tjetër fluturim, përveç këtyre dyve, kishte dhe një 20-vjeçar/e. Në dy fluturime të tjera, mendohet se ndodheshin gra që mund të shërbenin si dëshmitare në çështjen penale ndaj Maxwell.
Ndihmës prokurori thekson se zyra e tij kishte shqyrtuar mbi 100 faqe dokumentesh dhe qëllimi kishte qenë të mos krijoheshin “surpriza në të ardhmen”. Edhe pse emri i Trump është përmendur në kontekstin e çështjes Epstein, autoritetet amerikane nuk e kanë akuzuar atë për ndonjë shkelje penale në lidhje me Epstein. Përmendja e emrave në këto dokumente nuk nënkupton automatikisht përfshirje në veprimtari kriminale.
Trump, megjithatë, ka bërë përpjekje për t’u distancuar nga Epstein, duke e quajtur atë “një person të neveritshëm” dhe duke pohuar se nuk kishin pasur kontakt për një periudhë të gjatë para vdekjes së Epstein. Sidoqoftë, një analizë nga CNN sugjeron se marrëdhënia mes tyre kishte vazhduar deri në mesin e viteve 2000, pavarësisht përpjekjeve të Trump për ta minimizuar këtë lidhje.
Ky informacion hedh dritë mbi një pjesë të kaluarës së Trump dhe lidhjet e tij me Epstein, një figurë e njohur për skandalet e tij.
