Ekspertët amerikanë paralajmërojnë se një virus i ri, i njohur si super grip, po përhapet shpejt në Shtetet e Bashkuara, ndërsa vaksinimi nuk e mbulon këtë variant për këtë vit. Sipas Qendrës për Kontrollin dhe Parandalimin e Sëmundjeve (CDC), shkalla e shtrimeve në spital është rritur me 14.3% që nga e premtja e kaluar. Virusët po përhapen veçanërisht në Nju Jork, Luiziana dhe Kolorado, ndërsa raste të larta janë raportuar gjithashtu në Nju Xhersi, Rod Ajlend, si dhe në disa shtete të tjera si Xhorxhia, Nju Meksiko, Ajdaho, Miçigan, Karolinën e Veriut dhe të Jugut, Masaçusets, Konektikut, Merilend dhe Uashington D.C.
Sipas ekspertëve, gripi pritet të përhapet në të gjitha shtetet deri në fund të sezonit të gripit, në shkurt, me një rritje të konsiderueshme të infeksioneve. Analizat tregojnë se 90% e viruseve të gripit A janë pozitive për llojin e ri, i cili është përgjegjës për një numër të madh vdekjesh, veçanërisht te të moshuarit. Edhe pse vaksina e këtij viti nuk e mbulon gripin A, ekspertët rekomandojnë vaksinimin standard për të lehtësuar simptomat.
Simptomat e gripit përfshijnë ethe, të dridhura, kollë, dhimbje fyti, hundë që rrjedh, dhimbje muskujsh, lodhje dhe, ndonjëherë, të vjella ose diarre. Megjithatë, shumica e pacientëve mesatarisht e përjetojnë gripin dhe shërohen brenda disa ditësh ose javësh. Fatkeqësisht, ndërlikime si pneumonia mund të jenë vdekjeprurëse.
Me këtë rritje të infeksioneve, autoritetet shëndetësore theksojnë rëndësinë e mbajtjes së vigjilencës për të parandaluar përhapjen e mëtejshme të virusit, veçanërisht në këtë periudhë festive, kur kontaktet sociale rriten. Kjo situatë tregon nevojën për kujdes të shtuar dhe informim të vazhdueshëm për grupe të ndryshme në popullatë.
