Mbledhja e Këshillit të Mandateve, ku do të shqyrtohej imuniteti i zv.kryeministres Belinda Balluku, është shtyrë dhe nuk ka një datë të re për zhvillimin e saj. Ky vendim u mor mes debatesh të ashpra, pa konsensus nga anëtarët e Partisë Demokratike (PD). Anëtarët e Këshillit kanë marrë një USB me 10,000 faqe prova nga SPAK mbi Ballukun.
Pas mbledhjes, Gazment Bardhi kërkoi transparencë dhe informoi se ishin kërkuar procedura të hapura për qytetarët, duke lënë mundësinë që, në rastet kur prokuroria informon anëtarët e Këshillit, mbledhja të ndërpritej dhe media të largohej. Sipas tij, veprimi i mbylljes së mbledhjes dhe dorëzimi i USB ishte një skenar për t’i dhënë alibi Ballukut për shtyrjen e mbledhjes, duke pretenduar se nuk kishte pasur kohë për të shqyrtuar materialet.
Bardhi theksoi se situata dëshmon se Kryeministri Edi Rama ende nuk ka marrë një vendim për Ballukun, duke i dhënë atij më shumë kohë për të njohur provat. Ai vuri në dukje se kërkesa për të zhvilluar mbledhjen e ardhshme pas një muaji, më 20 janar, ishte e papranueshme dhe citoi rrezikun që vonesat mund të sjellin për integritetin e provave dhe mundësinë e intimidimit të dëshmitarëve.
