Qeveria ka iniciuar një projektligj të ri me tre komponentë, i cili synon forcimin e kontrollit territorial, çështjen e ndërtimeve pa leje dhe administrimin më eficient të pasurive të konfiskuara. Një nga ndryshimet kryesore është shpallja e Inspektoratit Qendror të Territorit, Mjedisit dhe Pyjeve, i cili do të bashkojë kompetencat e Inspektoratit Kombëtar të Mbrojtjes së Territorit dhe strukturave vendore. Ky institucion i ri do të ketë varësi qendrore dhe degë rajonale, me qëllim që të rrisë efektivitetin dhe pavarësinë në kontrollin mbi ndërtimet pa leje.
Ministria e Brendshme thekson se ky riorganizim do të rrisë kapacitetet inspektuese dhe do të garantohen procese inspektimi më të besueshme. Strukturat e reja pritet të aplikojnë një qasje të standardizuar për mbrojtjen e territorit.
Projektligji i dytë rishikon administrimin e objekteve të konfiskuara nga ndërtimet pa leje, duke i centralizuar këto procese në Agjencinë e Administrimit të Pasurive të Sekuestruara dhe të Konfiskuara (AAPSK). Sipas rregullave të reja, objektet e konfiskuara nuk do të mbeten të bllokuara, por do të përdoren për nevoja publike ose do të shiten përmes ankandit. Një Regjistër Elektronik publik do të sigurojë transparencë të plotë.
Ministria pret se këto rregulla do të krijojnë procedura më të shpejta dhe më të kontrollueshme, duke rritur të ardhurat nga shitja dhe përdorimin publik, përmirësuar sigurinë juridike për pronarët dhe garantuar transparencë maksimale.
Projektligji i tretë zgjeron rolin e AAPSK, duke përfshirë pasuritë e konfiskuara nga pushteti lokal, përfshirë ndërtimet pa leje. Një risi e rëndësishme është përfshirja e monedhave virtuale si pasuri e konfiskueshme dhe krijimi i një fondi të posaçëm për rikualifikimin dhe funksionalizimin e objekteve të paligjshme.
Këto iniciativa synojnë të adresojnë problematikat historike të ndërtimeve pa leje dhe menaxhimin e pasurive, duke garantuar një qasje më të sistematizuar dhe të rregulluar.
