Seanca e fundit e këtij sesioni parlamentar u mbyll brenda vetëm një ore, por kjo orë mjaftoi për ta shndërruar sallën e Kuvendit në një skenë tensioni dhe kaosi. Deputetët e Partisë Demokratike zunë vendet e ministrave dhe refuzuan të uleshin në ndenjëset e tyre, duke bllokuar zhvillimin normal të punimeve.
Situata u përshkallëzua më tej kur Sali Berisha bllokoi foltoren dhe nuk pranoi të largohej, ndërsa deputetë të PD u përplasën fizikisht me Gardën e Republikës, duke kërkuar largimin e saj nga salla. Mes thirrjeve, shtyrjeve dhe kaosit, u ndezën flakadanë, u hodhën ujë dhe letra në drejtim të kryesuesit të seancës, Niko Peleshi, si edhe ndaj efektivëve të Gardës.
Në këtë klimë të paprecedentë tensioni, drejtuesi i seancës kaloi drejtpërdrejt në votim, duke miratuar rendin e ditës dhe disa nga ligjet e parashikuara në agjendën e sotme, ndërsa seanca u mbyll mes zhurmës, përplasjeve dhe një atmosfere që rrallëherë është parë në sallën e Kuvendit.
