Nick Reiner, i akuzuar për dy vepra penale të vrasjes së shkallës së parë ndaj prindërve të tij, Rob Reiner dhe Michele Singer Reiner, u paraqit për herë të parë në gjykatë të mërkurën. 32-vjeçari është në paraburgim pa të drejtë lirimi me kusht dhe nuk ka deklaruar pafajësi apo fajësi. Seanca për formalizimin e akuzave është shtyrë për në janar, sipas raportimeve të “Guardian”.
Prokuroria e Qarkut të Los Anxhelosit ka ngritur dy akuza për vrasje të shkallës së parë ndaj Nick Reiner, për vrasje të shumëfishtë me përdorimin e një arme të rrezikshme, një thikë. Akuza u shpall dy ditë pas gjetjes së çiftit të pajetë në banesë. Sipas “New York Times”, vajza e çiftit, Romy, zbuloi trupin e të atit pasi një terapist masazhi nuk arriti të hynte në banesë. Pas përfundimit të hetimeve, policia arrestoi Nick Reiner të njëjtën mbrëmje.
Fëmijët e çiftit, Romy dhe Jake, publikuan një deklaratë ku shprehën falenderimin për mbështetje dhe kërkuan privatësi, duke apeluar që të respektohet kujtimi i prindërve të tyre. Prokurori Nathan Hochman theksoi se akuza nuk përbën provë dhe se barra e provës do të paraqitet në gjykatë, ndërsa avokati mbrojtës Alan Jackson kërkoi kujdes në trajtimin e çështjes dhe shmangien e gjykimeve të nxituara. Ai e cilësoi ngjarjen si një tragjedi shkatërruese për familjen Reiner.
Nick Reiner ka pasur probleme me abuzim të drogës dhe shëndetin mendor, dhe ka bashkë-shkruar filmin “Being Charlie”, i cili është frymëzuar pjesërisht nga përvojat e tij personale. Rob Reiner, një regjisor i njohur me veprat “This Is Spinal Tap” dhe “When Harry Met Sally”, dhe Michele Singer Reiner, një fotografe e njohur, ishin aktivë në kauza liberale politike.
Ngjarja ka tronditur komunitetin e Hollivudit, me miq të afërt që kanë publikuar një letër kujtese për Rob Reiner, duke e përshkruar si një figurë frymëzuese. Nick Reiner pritet të dalë sërish para gjykatës më 7 janar.
