Presidenti amerikan Donald Trump ka nënshkruar një shpallje që ndalon tifozët e Senegalit dhe Bregut të Fildishtë të udhëtojnë në Shtetet e Bashkuara për Kupën e Botës 2026. Administrata Trump njoftoi masa të reja ndalimi, duke pezulluar hyrjen për shtetasit e këtyre vendeve, duke prekur kështu të drejtën për të ndjekur ndeshjet nga afër.
Senegali, i vendosur në Grupin I me Francën, Norvegjinë dhe një ekip fitues të një “playoff”-i, do të luajë dy ndeshje në SHBA. Bregu i Fildishtë, i pozicionuar në Grupin E me Gjermaninë, Ekuadorin dhe Curaçaon, përballjet me Ekuadorin dhe Curaçaon do t’i zhvillojë gjithashtu në SHBA. Megjithatë, ndeshjet që zhvillohen në Kanada nuk do të kenë kufizime udhëtimi për tifozët.
Masa e ndalimit ndikon keq për shumë tifozë nga këto dy vende, të cilët janë mes 15 shteteve që përfshihen në shpalljen e fundit të administratës Trump, e cila e ka zgjeruar ndalimin në 12 vende të tjera që përballeshin me kufizime udhëtimi më herët. Kjo përfshin gjithashtu Iranin dhe Haiti, dy vende të tjera të kualifikuara, të cilat gjithashtu rrezikojnë të humbasin mundësinë për të parë ndeshjet nga afër.
Shtëpia e Bardhë ka sqaruar se ekzistojnë përjashtime për lojtarët, stafin dhe familjarët e afërt të ekipeve kombëtare, duke u siguruar kështu që yje si Iliman Ndiaye dhe Nicolas Jackson për Senegal, si dhe Amad Diallo për Bregun e Fildishtë, mund të udhëtojnë pa probleme.
Përveç këtyre pengesave, çmimet e larta të biletave për ndeshjet në SHBA kanë shkaktuar gjithashtu shqetësime mes tifozëve. Si përgjigje, FIFA ka prezantuar një kategori biletash “supporter entry tier” me çmim më të ulët, por shumë tifozë e kanë cilësuar këtë si një masë të papërshtatshme, duke argumentuar se vëllimi i biletave të disponueshme për secilin vend është shumë i vogël për të përmbushur kërkesat e tifozëve.
