Gjykata e Elbasanit ka vendosur të lirojë 16 të arrestuarit në kuadër të operacionit Metalurgjiku, duke e cilësuar arrestin e tyre si të paligjshëm. Seanca, e cila zgjati më shumë se 7 orë, u karakterizua nga numri i madh i personave dhe nevoja për përkthyes të licencuar për shtetasit e huaj.
Arrestimi i këtyre personave, 9 prej të cilëve ishin të huaj, erdhi pas ankesave të banorëve të zonës së Bradasheshit. Policia dhe prokuroria e Elbasanit, së bashku me Inspektoratin Kombëtar të Mbrojtjes së Territorit, zbuluan që dy biznese që vepronin në zonën e ish-Metalurgjikut, konkretisht CCAlb dhe GSA Ferrokrom, kishin kryer shkelje të rënda të legjislacionit ambiental, duke ndotur ajrin, ujërat dhe tokën.
Kontrolli në terren zbardhi se kompania GSA Ferrokrom nuk shfrytëzonte operatorë të licencuar për të menaxhuar mbetjet e hirit nga sistemi i Pluhur kapjes, ndërsa CCAlb dështoi të respektonte kriteret për riciklimin dhe asgjësimin e mbetjeve të baterive. Për këto shkelje, kompania GSA Ferrokrom dhe CCAlb, të udhëhequra nga administratorët Ilir Londo dhe Ergis Flaga, iu pezullua aktiviteti dhe u dënua me gjoba përkatësisht 10 dhe 3 milion lekë të rinj.
Përveç administratorëve, në pranga ranë edhe drejtorë prodhimi, inxhinierë dhe punëtorë, duke përfshirë përgjegjës turni dhe operator furre. Po ashtu, ndaj shefit të Sektorit të Mjedisit në Bashkinë Elbasan u vendosën masa penale për akuzat e “Shpërdorimit të detyrës” dhe “Falsifikimit të dokumenteve”.
Ky rast nxjerr në pah shqetësimet e vazhdueshme lidhur me mbrojtjen e mjedisit në Shqipëri dhe thekson rëndësinë e zbatimit të ligjeve për mbrojten e territorit.
