Ka filluar në Athinë takimi mes ministres së Jashtme shqiptare Elisa Spiropali dhe homologut të saj grek Jorgos Gjerapetritis. Pas një pritjeje nga Gjerapetritis në hyrje të ministrisë, bisedimet nisën me një takim kokë më kokë në zyrën e tij, për të vazhduar më pas me një takim mes dy përfaqësive.
Pala shqiptare po fokuson bisedimet në dy tema kryesore: integrimin europian të Shqipërisë dhe problemet që preokupojnë komunitetin shqiptar në Greqi. Këtu përfshihen çështje si pensionet dhe lehtësimi i procedurave për pajisjen me dokumentacionin grek. Ndërkohë, çështja e ligjit të luftës dhe e detit janë gjithashtu në axhendë, megjithatë, për momentin nuk janë dhënë detaje specifike për përmbajtjen e diskutimeve.
Sipas korrespondentit të Top Channel, Artur Bibe, pala greke po ashtu përfshin në axhendë çështjet dhe të drejtat e minoritetit etnik grek që jeton në Shqipëri, si dhe rifillimin e bisedimeve për dërgimin e çështjes së detit në Gjykatën e Hagës. Takimi pritet të adresojë një gamë të gjerë temash dypalëshe, duke theksuar rëndësinë e këtyre negociatave për të dy vendet.
