Drejtoresha e përgjithshme e Agjencisë Shtetërore të Kadastrës (ASHK), Lorena Goxhobelli, në një tryezë partneriteti mbi arritjet dhe sfidat në procesin e transformimit, theksoi se digjitalizimi i hartave kadastrale po përparon me ritme të shpejta. Ajo njoftoi se në bashkëpunim me UNOPS, ASHK ka filluar digjitalizimin e 33 mijë planesh, me synimin që deri në fund të vitit 2026, të arrijë një Kadastër tërësisht digjitale.
Goxhobelli gjithashtu theksoi rritjen e shërbimeve automatike, duke arritur në 10 shërbime që operojnë përmes teknologjisë blockchain. Një avancim i rëndësishëm është dhe finalizimi i mundësisë për pagesë përmes portalit e-Albania me kartë bankare, duke eliminuar nevojën për prezencë fizike në zyrat bankare apo në sportelet e ASHK.
Ajo shpjegoi se automatizimi i shërbimeve ka lehtësuar proceset për qytetarët, duke bërë që 10-15% e aplikimeve të përpunohen automatikisht nga sistemi. Goxhobelli theksoi se digjitalizimi i të dhënave nuk do të shkëpusë qytetarët, por do të ofrojë një akses më të lehtë dhe procedura më të shpejta, me objektivin për të shfrytëzuar Inteligjencën Artificiale si një hap të ardhshëm në shërbimin ndaj qytetarëve deri në vitin 2026.
Fokusi i ASHK-së gjatë këtij viti është digjitalizimi dhe regjistrimi fillestar, procese që jo vetëm përmirësojnë shërbimet, por dhe ndërtojnë një bazë të fortë për sigurinë dhe qartësinë e të drejtave pronësore. Aktualisht, 79% e aplikimeve trajtohen brenda afateve ligjore, një përmirësim i dukshëm në këtë fushë.
Në tryezën e partneritetit morën pjesë figura të rëndësishme, përfshirë ministrin e Shtetit për Pushtetin Vendor, Ervin Demo, drejtoresha e Agjencisë së Zhvillimit të Territorit, Adelajda Roka, dhe përfaqësues të institucioneve të ndryshme dhe grupeve të interesit lidhur me çështjet e pronësisë dhe tregut të pasurive të paluajtshme.
