Ylli i muzikës pop, Rita Ora, ka arritur një vit financiar të suksesshëm, duke fituar rreth 5.5 milionë euro në një periudhë 12-mujore. Kjo përkthehet në rreth 13,000 funte në ditë, që e çon pasurinë e saj të përgjithshme në rreth 35.5 milionë euro. Fitimet e Orës janë rezultat i një kombinimi të muzikës, turneve, projekteve televizive dhe një portofoli të gjërë reklamash.
Rita ka luajtur role të rëndësishme si trajnere dhe gjyqtare në programe si The Voice UK, The X Factor dhe The Masked Singer në Britani dhe SHBA, ndërsa ka marrë pjesë në projekte filmike si Kung Fu Panda: Dragon Knight dhe Fifty Shades. Ajo ka nënshkruar gjithashtu marrëveshje marketingu me marka të njohura si Adidas, Primark, Escada, Rimmel, si dhe me kompani pijesh si Próspero Tequila dhe Coca-Cola Zero Sugar.
Në një prononcim të fundit në Festivalin Ndërkombëtar të Filmit në Detin e Kuq, Ora foli mbi fuqizimin e grave, duke shprehur dëshirën për të zgjeruar ndikimin e saj edhe jashtë muzikës. Ajo nënvizoi rëndësinë e diskutimeve të hapura për çështjet që prekin gratë në të gjitha fushat e jetës. Gjithashtu, këngëtarja ndau një anë më personale, duke thënë se beson se ka “fuqi mistike”, të trashëguar nga gjyshja e saj, e cila sipas saj ishte një “shtrigë”.
Ora u shpreh se ndjen se ka këtë forcë që vjen nga historia familjare dhe shprehu besimin se edhe përballë sfidave, dëshiron të inspirojë gjeneratat e ardhshme me energjinë e fuqizimit.
Me një karrierë të diversifikuar dhe një angazhim për çështjet e grave, Rita Ora vazhdon të jetë një influencuese e rëndësishme në industrinë e muzikës dhe më gjerë.
