Presidenti amerikan Donald Trump po intensifikon presionin mbi presidentin venezuelian Nicolás Maduro, përmes zgjerimit të sanksioneve dhe kërcënimeve ndaj objektivave në Venezuelë. Në këtë kontekst, Trump shpalli kufizime të reja ndaj tre nipërve të bashkëshortes së Maduros, Cilia Flores, dhe gjashtë supertankerëve të naftës, për shkak të praktikave të dyshimta që ndihmojnë në financimin e regjimit të tij.
Departamenti i Thesarit të SHBA-së njoftoi se këto anije ishin pjesë e aktiviteteve kriminale dhe se katër prej tyre kishin ngarkuar naftë në Venezuelë, duke bartur flamuj nga Panama, Ishujt Cook dhe Hong Kong. Po ashtu, Trump ripërsëriti kërcënimet për goditje ndaj dërgesave të mundshme të narkotikëve që kalonin nga Venezuela në SHBA, pas sekuestros së një tankeri pranë brigjeve venezueliane.
Reagimi i Maduros ishte i ashpër, duke e akuzuar SHBA-në për hapjen e një “epoke të re të piraterisë detare”. Ai theksoi se do të sigurojë flotën për të mbrojtur tregtinë e naftës. Zëdhënësja e Shtëpisë së Bardhë, Karoline Leavitt, konfirmoi planin për ta dërguar tankerin Skipper në një port amerikan dhe për të konfiskuar naftën e tij.
Sipas Reuters, SHBA është duke përgatitur sekuestro të tjera të tankeve pranë Venezuelës, me Leavitt që theksoi se administrata nuk do të “rrijë duarkryq” përballë anijeve të sanksionuara. Në një zhvillim tjetër, presidenti rus, Vladimir Putin, kontakt u Maduros për të konfirmuar mbështetje për qeverinë venezueliane dhe për të diskutuar zgjerimin e bashkëpunimit ekonomik, duke përfshirë projektet në fushën e naftës.
Në Washington, kritikët po e shohin sekuestrimin e tankerit si një rrezik të mundshëm për një konflikt të gjatë. Ligjvënës të lartë demokratë dhe një republikan e kanë dënuar veprimin dhe kanë shprehur shqetësim për pasojat që mund të ketë.
Ndërkohë, fqinjët e Venezuelës, si Kolumbia, po shohin mundësi të reja. Ministrja e Jashtme kolumbiane, Rosa Villavicencio, njoftoi se Kolumbia mund t’i ofronte Maduros strehim, një sinjal i rëndësishëm për evoluimin e dinamikës rajonale në krizën venezueliane.
