Katër persona të dyshuar për pengmarrje në Vlorë janë arrestuar nga policia. Sipas informacioneve, ata dyshohet se kanë marrë peng një shtetas kosovar, i cili është mbajtur në një banesë afër Rrugës së Re. Të arrestuarit, të gjithë nga fshatrat e Lumit të Vlorës, i kërkonin pengut një shumë prej 70 mijë eurosh.
Shtetasi kosovar është mbajtur peng për dy javë dhe sipas hetimeve, dyshohet se është dhunuar gjatë kësaj periudhe. Zbulimi i rastit erdhi pas njoftimit të motrës së tij, e cila jeton në Suedi. Ajo informoi autoritetet shqiptare, çka çoi në organizimin e një operacioni për gjetjen e vendndodhjes së pengut dhe arrestimin e të dyshuarve.
Policia e Vlorës ka vepruar me shpejtësi, duke konfirmuar se arrestimet u realizuan falë bashkëpunimit me motrën e viktimës. Të arrestuarit përballen me akuza të rënda dhe situata po hetohet nga autoritetet kompetente.
