Opinion nga Timoni.al
Zgjedhja e Klodian Brahos si drejtues i ri i SPAK ishte një nga zhvillimet më të ndjekura të ditës në politikë, media dhe botën e biznesit. Interesi ishte i lartë sepse të gjitha këto fusha si politika, oligarkët, media, prej vitesh janë përfshirë në afera dhe ndërthurje korruptive, dhe drejtuesi i ri i SPAK pritet të ndikojë drejtpërdrejt për fatet e çdo pale.
Pavarësisht se politika shqiptare, si majtas ashtu edhe djathtas, preferonte kandidaturën e Adnan Xholit, ishte Uashingtoni ai që e vendosi qartë drejtimin: vazhdimësia e punës së Altin Dumanit duhej garantuar. Kështu, Braho u pa si njeriu i duhur për të ruajtur ritmin e reformës në drejtësi dhe hetimeve të nisura.
Zgjedhja e tij është një lajm i keq për opozitën tradicionale, në veçanti për Sali Berishën dhe Lulzim Bashën. Burime të besueshme tregojnë se Braho pritet të hetojë me ritme të shpejta dosjet e 21 Janarit dhe çështje të tjera të ndjeshme që prekin drejtuesit e lartë të opozitës. Ndër emrat më të përfolur për masa të shpejta hetimore është edhe Belind Këllici, Flamur Noka dhe disa emra të tjerë, çka mund të prodhojë një tërmet të vërtetë politik.
Ky zhvillim përbën lajm negativ për kupolën aktuale të PD, por paradoksalisht është lajm i mirë për demokratët dhe për vendin. Goditjet e mundshme ndaj lidershipit aktual të PD krijojnë terrenin që opozita më në fund të zgjedhë një lider të ri, të pa lidhur me të shkuarën dhe të gatshëm të prodhojë ndryshim real.
Një kryetar i ri i opozitës do të çlironte politikën shqiptare nga marrëveshjet e heshtura mes Ramës dhe Berishës, marrëveshje që, sipas burimeve, kanë funksionuar prej kohësh për të mbrojtur njëri-tjetrin nga drejtësia. Thyerja e këtij boshti do të sillte një rigjallërim politik të menjëhershëm, do të rriste konkurrencën dhe shanset reale që pushteti i vendit të ndryshojë pas katër mandateve të Edi Ramës, një periudhë e shoqëruar me rekorde negative në ekonomi, bujqësi, arsim, shëndetësi dhe me eksod masiv të qytetarëve.
Shtetet e Bashkuara e kanë kërkuar prej vitesh një lidership të ri në Partinë Demokratike, por rikthimi i Sali Berishës ka bllokuar çdo tentativë modernizimi. Në këtë situatë, drejtësia e re mbetet mekanizmi i vetëm që mund të hapë derën për një opozitë të re dhe realisht funksionale.
Zgjedhja e Klodian Brahos në krye të SPAK shënon pikërisht fillimin e këtij kapitulli. Shqipëria mund të futet më në fund në një cikël të ri politik, më të pastër, më konkurrues dhe më të afërt me vlerat europiane.
