E ardhmja e Mohamed Salah te Liverpooli është sërish në pikëpyetje pas tensioneve të fundit brenda klubit. Sulmuesi egjiptian mund të largohet në merkaton e janarit, ndërsa disa klube nga Arabia Saudite kanë filluar lëvizjet për ta transferuar atë. Megjithëse trajneri Arne Slot ka theksuar se “marrëdhëniet nuk janë krisur”, situata aktuale e bën të vështirë për të imagjinuar një të ardhme të gjatë të Salah në Anfield.
Në prill, Salah rinovoi kontratën me Liverpool, duke u lidhur deri në vitin 2027 me një rritje të konsiderueshme page, nga 20.9 në 23.9 milionë euro bruto në sezon. Kjo ishte një pengesë për klubet evropiane, por jo për Saudi Pro League, e cila kohët e fundit ka tërhequr disa lojtarë të njohur në radhët e saj. Fondi PIF, që financion klubet kryesore saudite, është i gatshëm të ndërhyjë për të sjellë Salah në kampionat që në janar. Me afrimin e Kupës së Afrikës, kur egjiptiani do të jetë i angazhuar për disa javë, pritet që lëvizjet për transferimin e tij të intensifikohen.
Pavarësisht ofertave të rëndësishme të mëparshme, si ajo prej 150 milionë paund nga Al Ittihad në vitin 2023, Salah nuk ka pranuar asnjëherë të largohet nga Liverpool. As Al Hilal, as klubet e tjera saudite nuk kanë arritur ta bindin 31-vjeçarin deri më tani. Megjithatë, marrëdhëniet e tensionuara me Slot mund të ndikojnë në vendimin e tij të ardhshëm.
Tani gjithçka varet nga dy faktorë: nëse Salah do të konsiderojë një largim drejt Arabisë Saudite dhe nëse Liverpool do të pranojë të negociojë gjatë sezonit. E ardhmja e Salah mbetet e paqartë; ai dhe Slot duhet të bëjnë një hap prapa për të zbutur tensionet, ose janari mund të sjellë një nga transferimet më të dukshme të vitit.
