Një hetim i realizuar nga BBC ka dëshmuar se rreth 200 fëmijë në 14 vende europiane, përfshirë Shqipërinë, janë ngjizur nga një dhurues materiali gjenetik që ishte bartës i një gjenit të lidhur me kancerin. Sipas informacionit, dhuruesit nuk ishin në dijeni të këtij mutacioni, i cili rrit ndjeshëm rrezikun e sëmundjeve të rënda. Disa fëmijë kanë ndërruar jetë dhe medya britanike sugjeron se një pjesë e vogël e atyre që e trashëgojnë këtë mutacion do t’i shpëtojnë kancerit gjatë jetës së tyre.
Materiali gjenetik nuk është shitur në klinikat britanike, por BBC ka konfirmuar se disa familje britanike, të cilat tashmë janë njoftuar, e kanë përdorur këtë lëndë gjatë trajtimit të fertilitetit në Danimarkë. Banka Europiane e Lëndës Gjenetike në Danimarkë ka shprehur mbështetje për familjet e prekura dhe ka pranuar se materiali është përdorur për të krijuar shumë foshnja në disa vende.
Dhuruesi, identiteti i të cilit është mbajtur anonim, ka filluar dhurimin e tij që nga viti 2005, në kohën kur ishte student. Gjatë këtyre viteve, materiali i tij gjenetik është përdorur nga gra për rreth 17 vjet. Edhe pse ai vetë nuk është i sëmurë dhe ka kaluar të gjitha kontrollet për dhuruesit, ADN-ja e disa qelizave të tij ka pësuar një mutacion që dëmton gjenin TP53, i cili luan një rol kyç në parandalimin e transformimit të qelizave në kancerogjene.
Megjithëse ai duket i shëndetshëm, fëmijët e lindur nga materiali i tij gjenetik do ta kenë mutacionin në çdo qelizë të trupit të tyre. Hetimi është realizuar nga 14 transmetues publikë si pjesë e një rrjeti të gazetarisë investigative të Bashkimit Europian, që nënvizon rrezikun që paraqet ky fenomen për shëndetin e brezit të ri.
