Gazeta “New York Post” ka publikuar foto të dy djemve që dyshohet se janë fëmijët e Presidentit rus Vladimir Putin me ish-gjimnasten Alina Kabaeva. Fotoja tregon Ivanin, 10 vjeç dhe Vladimir Juniorin, 6 vjeç, duke u stërvitur për gjimnastikë, një disiplinë që ka ushtruar edhe nëna e tyre. Ivani, në një intervistë, ka përmendur lëvizjet “e bukura” që ka mësuar nga kampionët olimpikë si Alexei Nemov, Evgenia Kanaeva, dhe Tagir Khaibulaev.
Sipas raportimeve, këto pamje janë nga një aktivitet i organizuar nga Kabaeva në janar në akademinë që mban emrin e saj. Gazeta informon se Putin mban djemtë e tij nën mbrojtje dhe jetojnë në një kompleks të fortifikuar në Valdai, jo shumë larg Moskës, për t’i mbrojtur nga rreziqet. Djemtë, me mbiemrin e rremë “Spiridonov”, janë të regjistruar si Ivan dhe Vladimir Spiridonov. Informacioni rreth Alina Kabaeva dhe fëmijëve të saj është fshirë nga bazat e të dhënave shtetërore, duke i dhënë atyre një identitet të ri në përpjekje për të ruajtur privatësinë e tyre, sipas gazetarëve Roman Bananin dhe Mikhail Rubin.
Emri “Spiridonov” është një referencë për gjyshin e Putinit, i cili jetoi nga viti 1879 deri në vitin 1965. Raportet sugjerojnë se Putin dhe Kabaeva, e cila është 41 vjeçare, janë në një lidhje që nga viti 2008, por kjo lidhje nuk është konfirmuar publikisht. Këto zbulime hapin më shumë pyetje rreth jetës private të presidentit rus dhe mënyrës se si ai përpiqet të mbronte familjen e tij nga ekspozimi publik.
