Presidenti amerikan Donald Trump ka shprehur kritika të rënda ndaj Bashkimit Evropian dhe liderëve të tij, duke i cilësuar vendet e Evropës si “në proces kalbjeje” dhe të udhëhequra nga individë “të dobët”. Në një intervistë për Politico, ai akuzoi udhëheqësit evropianë se janë “politikisht korrekt” dhe “nuk dinë çfarë të bëjnë”, duke theksuar se politika e migracionit po krijon një krizë serioze në Evropë.
Trump mbështeti qëndrimet e ashpra të Hungarisë dhe Polonisë ndaj migracionit, duke vlerësuar se shumica e vendeve të tjera po lejojnë hyrje të pakontrolluara. Ai paralajmëroi se Evropa do të dobësohet sepse migrantët kanë ideologji të ndryshme nga vendet ku hyjnë. Në intervistë, Presidenti amerikan shprehu gatishmërinë për të mbështetur individë si kryeministri hungarez Viktor Orbán, pavarësisht kritikave nga BE.
Ai gjithashtu goditi kryebashkiakun e Londrës, Sadiq Khan, duke e quajtur “katastrofë” dhe duke shprehur shqetësim për gjendjen aktuale të Londrës dhe Parisit. Trump sugjeroi që vendet evropiane duhet të dëbojnë emigrantët ilegalë dhe të braktisin politikën “politikisht korrekte”, e cila sipas tij, është një burim dobësie.
Në lidhje me përpjekjet për paqe në Ukrainë, Trump shprehu skepticizëm për rolin e BE-së, duke thënë se “Evropa flet, por nuk prodhon asgjë, ndërsa lufta vazhdon”. Këto komente e ilustrojnë më tej qëndrimin e tij të ashpër ndaj politikave dhe qëndrimeve të vendeve evropiane, duke nxjerrë në pah shqetësimet e tij për ndikimin e migracionit dhe ketë ndihmë në përpjekjet për zgjidhjen e konflikteve në rajon.
