Ministrja e Arsimit, Mirela Kumbaro, dhe ministri i Mbrojtjes, Piro Vëngu, vizituan kampusin e ri të Akademisë së Forcave të Armatosura, i cili shtrihet në një sipërfaqe prej 7,600 m² dhe ofron kushte moderne për formimin e profesionistëve të ardhshëm në fushën e mbrojtjes. Ky kampus përfshin klasa me teknologji të avancuar, auditorë, laboratorë, një poligon stërvitor, pishinë, ambiente sportive, si dhe hapësira që plotësojnë standardet e NATO-s.
Gjatë vizitës, Kumbaro theksoi rëndësinë e këtij investimi, duke e cilësuar si një kontribut në fushën e arsimit, pavarësisht se nuk është pjesë direkte e buxhetit të Ministrisë së Arsimit. Ajo theksoi se gjithashtu ky projekt është i rëndësishëm për të përmbushur kërkesën në rritje për profesionistë të armatës dhe për të zgjeruar ofertën akademike. Ministrja përmendi modelin e masterit të kombinuar në marinë, aviacion dhe inxhinieri në Universitetin e Vlorës, i cili synon të krijojë mundësi ndërkombëtarizimi dhe të garantojë cilësinë e arsimit të lartë.
Nga ana e tij, ministri Vengu theksoi që kampusi do të shërbejë si një qendër ekselence për formimin ushtarak dhe akademik. Ai njoftoi se infrastruktura dhe standartet pedagogjike të reja do të përgatisin kuadro të afta për misione kombëtare dhe ndërkombëtare. Vengu përmendi shifrat rekord të aplikimeve për këtë vit, me 1,630 kërkesa për vetëm 80 vende, dhe lajmëroi se programet bachelor dhe master do të fillojnë në shkurt.
Ministri gjithashtu e theksoi se studentët e akademisë do të trajtohen me pagesë gjatë periudhës së studimeve dhe do të kenë mundësi për specializim në akademi prestigjioze në Europë dhe Shtetet e Bashkuara. Ky investim përcakton një standard të ri për arsimimin ushtarak në Shqipëri dhe kontribuon në vizionin e integrimit euroatlantik dhe modernizimin e institucioneve të mbrojtjes.
