Komisioni Qendror i Zgjedhjeve (KQZ) në Kosovë ka miratuar mbi 70 mijë aplikime për regjistrimin e votuesve jashtë vendit për zgjedhjet e parakohshme parlamentare që do të mbahen më 28 dhjetor. Zëdhënësi i KQZ-së, Vladimir Elezi, konfirmoi për Radion Evropa e Lirë se nga 84.700 aplikime të pranuara në periudhën 26 nëntor – 6 dhjetor, janë aprovuar rreth 71.900, ndërkohë që 6.700 janë refuzuar dhe 5.900 janë në proces vlerësimi.
Sipas Elezit, më shumë se 51.000 votues janë regjistruar për të votuar përmes postës, dhe rreth 2.500 do të dërgojnë fletëvotim në kutinë postare të KQZ-së në Kosovë. Po ashtu, 18.000 qytetarë që kanë aplikuar do të votojnë fizikisht në përfaqësitë diplomatike. Në zgjedhjet e fundit të mbajtura më 9 shkurt, KQZ-ja regjistroi rreth 105 qytetarë për të votuar nga diaspora. Aty, Kosova organizoi për herë të parë votimin fizik në ambasada dhe konsullata në 19 vende të botës.
Zgjedhjet e parakohshme janë shpallur pasi partitë politike nuk arritën konsensus për të formuar qeverinë pas rezultatit të zgjedhjeve të shkurtit, ku Lëvizja Vetëvendosje fitoi 48 ulëse në Kuvend, duke lënë prapa Partinë Demokratike të Kosovës (24 ulëse) dhe Lidhjen Demokratike të Kosovës (20 ulëse). Disa parti kanë mbështetur caktimin e 28 dhjetorit si datë zgjedhjesh, argumentuar me faktin se shumë shqiptarë nga diaspora kthehen në Kosovë për festat.
Megjithatë, disa parti kanë shprehur shqetësime për monitorimin e procesit zgjedhor, duke theksuar që një pjesë e vëzhguesve ndërkombëtarë mund të mos jenë të angazhuar për shkak të pushimeve. Presidentja e Kosovës, Vjosa Osmani, ka sqaruar se KQZ-ja kishte nevojë për më shumë kohë për t’u përgatitur, duke pasur parasysh se vendi kishte mbajtur dy procese zgjedhore më parë në tetor dhe nëntor.
