Aleanca për Ardhmërinë e Kosovës (AAK) ka propozuar Ramush Haradinaj si kandidat për kryeministër në zgjedhjet e parakohshme të 28 dhjetorit. Haradinaj do të jetë gjithashtu bartës i listës për këto zgjedhje, dhe partia do të garojë me sloganin “Krah teje”.
Në një postim në Facebook, Haradinaj njoftoi miratimin e listës me 110 kandidatë për deputetë dhe të programit zgjedhor në mbledhjen e Këshillit të Përgjithshëm të AAK-së. Programi bazohet në tri shtylla: qëndrueshmëria dhe trashëgimia, mirëqenia dhe zhvillimi ekonomik, si dhe siguria dhe integrimi euro-atlantik. Ai theksoi se AAK synon rikthimin e normalitetit në vend, zhvillimin, anëtarësimin në NATO dhe BE, si dhe forcimin e partneritetit me SHBA-në për sigurinë dhe ruajtjen e shtetit.
Ramush Haradinaj ka shërbyer dy herë si kryeministër i Kosovës. Në zgjedhjet e fundit parlamentare, të mbajtura më 9 shkurt, AAK-ja garoi në koalicion me Nismën Socialdemokrate dhe disa parti të tjera, duke fituar 66.256 vota, që përbën 7.06 për qind. Nga tetë deputetë, pesë ishin nga AAK-ja dhe tre nga Nisma Socialdemokrate e Fatmir Limajt.
Të tjera parti shqiptare gjithashtu kanë nominuar kandidatët e tyre për kryeministër. Lëvizja Vetëvendosje e ka propozuar Albin Kurtin, Partia Demokratike e Kosovës do të garojë me Bedri Hamzën, kurse Lidhja Demokratike e Kosovës ka nominuar Lumir Abdixhikun. Të katër kandidatët ishin gjithashtu në garë për kryeministër në zgjedhjet e zhvilluara më 9 shkurt të këtij viti.
