Drejtuesi i Prokurorisë së Posaçme, Altin Dumani, dhe prokurorja e posaçme, Dorina Bejko, morën pjesë më 2-3 dhjetor në një takim të nivelit të lartë të prokurorëve nga katër vende të Ballkanit Perëndimor dhe 11 vende të Amerikës Latine, zhvilluar në selinë e EUROJUST-it në Hagë.
Dumani theksoi rëndësinë e bashkëpunimit me agjencitë partnere dhe shkëmbimin e shpejtë të informacionit, duke sjellë si shembull transformimin e SPAK-ut nga një agjenci që merrte informacion në një institucion që furnizon partnerët ndërkombëtarë me të dhëna të verifikuara dhe operacionale. Ai e cilësoi SPAK-un si një kontribues të rëndësishëm në sigurimin e rendit publik.
Në kuadër të këtij takimi, Dumani zhvilloi takime bilaterale me homologët e Paraguajit, Perusë, Kilit, Brazilit, Kolumbisë, Republikës Domenikane dhe Ekuadorit. Gjatë këtyre takimeve, SPAK nënshkroi pesë memorandume mirëkuptimi me prokuroritë e Brazilit, Kilit, Kolumbisë, Republikës Domenikane dhe Paraguajit. Qëllimi i këtyre marrëveshjeve është forca e bashkëpunimit në luftën kundër krimit të organizuar, me një fokus të veçantë në trafikun e lëndëve narkotike.
Aktivitetet u zhvilluan brenda një eventi më të gjerë tre ditor, që është organizuar për herë të parë nga EUROJUST me partnerët e vendeve të treta. Gjatë këtij eventi, përveç përfaqësuesve të Bashkimit Europian dhe vendeve të Ballkanit Perëndimor, morën pjesë gjithashtu përfaqësues nga Lindja e Mesme dhe Afrika e Veriut. Fokus i këtij eventi ishte forcimi i bashkëpunimit operacional midis këtyre rajoneve dhe Bashkimit Europian.
Drejtuesit e SPAK-ut u angazhuan për të intensifikuar përpjekjet në luftën kundër krimit të organizuar dhe të trafikut të drogës, duke forcuar rrjetin e bashkëpunimit ndërkombëtar. Këto aktivitete dëshmojnë për përpjekjet e vazhdueshme për të ndihmuar në sigurimin e një rendi më të sigurt dhe të drejtë.
