Detaje të reja janë shfaqur rreth vrasjes së 49-vjeçares Sadjide Muslija në Ankona të Italisë, e cila dyshohet se është kryer nga burri i saj, Nazif Muslija, 50 vjeç. Viktima u gjet në shtëpinë e saj me shenja të dhunës brutale. Nazif Muslija, i njohur për precedentë të dhunës në familje dhe i arrestuar më parë për sulm ndaj gruas me një sëpatë, është në kërkim. Ai është larguar me një makinë Smart, dhe telefoni i tij celular nuk është i arritshëm që nga mëngjesi i djeshëm.
Hetuesit mjeko-ligjorë po punojnë për të identifikuar armën e krimit, e cila dyshohet se mund të jetë një shkop, por deri tani ende nuk është gjetur. Avokati i Nazif Muslijas, Antonio Gagliardi, ka kontaktuar djalin e çiftit, që jeton në Zvicër, për ta informuar për tragjedinë. Djali, i cili vitin e kaluar kishte ndihmuar nënën e tij të strehohej për shkak të dhunës, kishte thënë: “E prisja këtë…”.
Prokurori Rosario Lioniello ka urdhëruar sekuestrimin e shtëpisë ku ndodhi krimi dhe është planifikuar një autopsi për të përcaktuar shkakun dhe kohën e vdekjes së viktimës. Në përpjekje për të gjetur Nazif Muslijen, programi “Chi l’ha visto?” i Rai3 ka publikuar fotografinë e tij dhe kërkon ndihmën e publikut për çdo informacion që mund të çojë në kapjen e tij. Hetuesit po përpiqen të ngushtojnë fushën e hetimit dhe të sqarojnë rrethanat rreth kësaj ngjarjeje tragjike.
