Një sondazh i kryer në nëntë vende të Bashkimit Europian zbuloj se pothuaj gjysma e qytetarëve europianë e konsiderojnë Donald Trump një rrezik direkt për kontinentin. Perceptimi negativ për Presidentin amerikan është më i theksuar në Belgjikë me 62% dhe Francë me 57%. Në anën tjetër, ai është më i ulëti në Kroaci (37%) dhe Poloni (19%).
Sondazhi, i realizuar për platformën franceze “Le Grand Continent”, tregon se europianët ndihen gjithnjë e më të pasigurt për të ardhmen. Një shumicë relative, 51%, besojnë se rreziku i një lufte të hapur me Rusinë në vitet e ardhshme është i lartë, ndërsa 18% e vlerësojnë atë si “shumë të lartë”.
Ndërkohë, në mes të kësaj frike, qytetarët theksojnë rëndësinë e marrëdhënieve me Shtetet e Bashkuara. Më shumë se gjysma e të anketuarve preferojnë që BE-ja të ndjekë një politikë “kompromisi” me administratën amerikane (48%).
Pjesëmarrësit e sondazhit shprehin gjithashtu një qëndrim të fortë pro-BE-së, me gati tre të katërtat e tyre që duan mbetjen në union. Një shumicë e madhe beson se dalja e Britanisë nga BE ka pasur pasoja negative për vetë Britaninë e Madhe.
Jean-Yves Dormagen, drejtor i agjencisë së sondazheve Cluster17, thekson se rezultatet tregojnë një Europë të shqetësuar dhe të vetëdijshme për dobësitë e saj. Ai vëren se perceptimi i Trump-it si kërcënim është forcuar ndjeshëm krahasuar me vitin e kaluar, dhe frika nga një konflikt i mundshëm në kontinent është rritur, e cila do të dukej e paimagjinueshme disa vjet më parë.
Në këtë kontekst, sondazhi hedh dritë mbi shqetësimet aktuale të qytetarëve europianë për stabilitetin e kontinentit dhe rolin e Shteteve të Bashkuara në marrëdhëniet ndërkombëtare.
