Ministrja për Europën dhe Punët e Jashtme, Elisa Spiropali, ndodhet në Vjenë për Këshillin e 32-të Ministror të OSBE-së, që po zhvillohet në Pallatin Hofburg. Ajo u mirëprit nga Kryesuesja e OSBE, Ministrja e Jashtme e Finlandës, Elina Valtonen. Ky Këshill shënon Kryesinë e Finlandës në OSBE dhe 50 vjetorin e Aktit Final të Helsinkit, që themeloi Organizatën për Siguri dhe Bashkëpunim.
Në qendër të diskutimeve janë parimet themelore të sigurisë europiane, si barazia, integriteti territorial, zgjidhja paqësore e mosmarrëveshjeve dhe respekti për të drejtat e njeriut. Shkeljet e këtyre parimeve nga agresioni rus ndaj Ukrainës do të jenë tema kryesore. Një vëmendje e veçantë do t’i kushtohet përgatitjes së OSBE-së për sfidat e së ardhmes, një prioritet i Kryesisë finlandeze. Spiropali do të theksojë angazhimin e Shqipërisë për paqen, stabilitetin dhe sigurinë në rajon.
Përveç se merr pjesë në Këshillin Ministror, Spiropali do të zhvillojë takime me Zyrtarin e Lartë të Departamentit Amerikan të Shtetit për Çështjet Europiane, Brendan Hanrahan, për të thelluar bashkëpunimin në kuadër të partneritetit strategjik Shqipëri-SHBA. Ajo do të marrë pjesë edhe në tryezën e Ministrave të Jashtëm të nismës “Miqtë e Ballkanit Perëndimor”, të organizuar nga Ministrja e Jashtme austriake, Beate Meinl-Reisinger. Në këtë takim pritet të jenë të pranishëm gjithashtu Zëvendës Presidentja e Komisionit Europian, Kryediplomatja europiane Kaja Kallas, dhe Komisionerja për Zgjerimin e BE, Marta Kos.
Spiropali ka në program edhe disa takime bilaterale me homologë nga Rumania, Armenia dhe Gjeorgjia, si dhe me zyrtarë të lartë të OSBE-së, për të forcuar marrëdhëniet dhe bashkëpunimin në nivele të ndryshme. Kjo vizitë reflekton angazhimin e Shqipërisë në sigurimin e paqes dhe stabilitetit në rajon.
