Prokuroria e Tiranës ka marrë masa ndaj shtetases E.D. për veprat penale të “Falsifikimit të dokumenteve” dhe “Pastrimit të produkteve të veprës penale”. Ajo është nën hetim për transferimin e paligjshëm të pasurive të shoqërisë “Prodhim Veshje nr.02” sh.a, duke përfituar mbi 1 milion euro në dëm të aksionerëve të tjerë.
Hetimet e Prokurorisë, të regjistruara në procedimin nr.2130 datë 26.03.2025, kanë zbuluar se në vitin 2013 E.D., si përfaqësuese ligjore e shoqërisë, ka falsifikuar dokumente për të transferuar të gjitha pasuritë e paluajtshme të shoqërisë në favor të “Empire Investment Solution (EIS)” sh.p.k. Kjo shoqëri, në momentin e krijimit, ka qenë 100% nën kontrollin e E.D.
Pas kalimit të pasurive, për të fshehur origjinën e paligjshme të kapitalit, ajo ka transferuar dhe pronësinë e kuotave të shoqërisë. Pasuritë e transferuara, përfshirë toka dhe ndërtesa, janë dhënë me qira dhe kanë generuar të ardhura të larta. Një pjesë e pasurive të shkelura janë shitur, duke realizuar mbi 1 milion euro. Një rast i veçantë është ai i pasurisë në Rrugën “Muhamet Gjollesha”, e cila është dhënë për ndërtimin e një objekti shumëkatësh multifunksional.
Transferimi i aseteve është kryer përmes dokumenteve të falsifikuara dhe akteve të tjera të paligjshme, duke dëmtuar interesat e aksionarëve minoritarë, të cilët përfshinin pensionistë (ish-punonjës të ndërmarrjes shtetërore). Këta aksionarë ishin në vështirësi për të realizuar të drejtat e tyre.
Gjykata ka vendosur masën e sigurimit “Arrest në shtëpi” për E.D., e cila është akuzuar për vepra penale. Vlerat e dëmit dhe produkti i veprës penale janë ende duke u hetuar. Prokuroria e Tiranës vazhdon hetimet për të zbardhur plotësisht situatën dhe për të mbrojtur të drejtat e aksionarëve të shoqërisë.
