Një tjetër arrestim është bërë lidhur me vrasjen e biznesmenit Mondi Mehalla, alias Edmond Hyka, e ndodhur disa ditë më parë në Elbasan. Policia ka arrestuar në Përrenjas Nevzat Spahon, 33 vjeç, i dyshuar për lidhje me rastin.
Si pjesë e hetimeve, është arrestuar edhe Xhino Ago, ortaku i viktimës, i cili akuzohet për “Vrasje me paramendim” dhe “Prodhimi dhe mbajtja pa leje e armëve”. Po ashtu, kujdestari i karburantit, Kujtim Pisha, 52 vjeç, u arrestua për “Moskallëzim i krimit”.
Në kërkim janë shpallur Marselo Arani, 32 vjeç, dhe Armando Kola, 35 vjeç, të dyshuar si autorë të vrasjes. Arani kishte qenë më parë nën masën e sigurisë “Arrest në shtëpi” për një vepër tjetër penale dhe është arrestuar më parë për pastrim parash, ku iu sekuestruan pasuri me vlerë 136 mijë euro. Automjeti i përdorur në krim i përkiste Xhino Agos, i cili ia kishte dhënë me hua Aranit.
Sipas hetimeve, shkaku i vrasjes dyshohet të jetë prishja e marrëdhënieve mes ortakëve. Një grup i posaçëm hetimor, nën drejtimin e Prokurorisë, vazhdon veprimet për identifikimin dhe kapjen e personave të tjerë që mund të jenë të përfshirë në ngjarje.
