Kryetarja e Forumit të Gruas së Partisë Demokratike në njësinë 14 në Tiranë Blerina Gjyriqi, ka publikuar një reagim të fuqishëm mbi gjendjen e brendshme të kampit opozitar, duke vënë në qendër rolin e brezave të rinj në politikë. Sipas saj, opozita ndër vite ka ngritur një strukturë të ngurtë dhe të plakur, e cila vazhdon të mbështetet tek “modele të konsumuar” dhe strategji të vjetruara, duke prodhuar figura politike pa meritokraci.
Gjyriqi thekson se pikërisht në këtë sistem po goditet më fort “Gjenerata Y”, brezi i saj: një brez i arsimuar, i përgatitur, me vlera dhe me vullnet për t’u angazhuar politikisht, por që, siç shprehet ajo, “sistematikisht përjashtohet nga loja dhe nga fronti i luftës”.
Në reagimin e saj kritik, ajo i referohet edhe “Gjeneratës X”, për të cilën thotë se ka dështuar të ndërtojë një raport besimi me brezin që e ka ndjekur dhe mbështetur prej vitesh. “Një brez që nuk kërkoi asgjë në këmbim, por sot shpërblehet me indiferencë,” shprehet Gjyriqi.
Ajo paralajmëron se situata po bëhet edhe më problematike me afrimin e “Gjeneratës Z”, e cila sipas saj po përgatitet nga të njëjtat figura të vjetra që nuk pranojnë të lëshojnë karrigen. Kjo, sipas Gjyriqit, rrezikon të prodhojë “versionin më të keq të tyre”, duke e kthyer trashëgiminë politike në një cikël zhgënjimi.
Në përfundim, Gjyriqi thekson se problemi nuk qëndron vetëm te përjashtimi i brezit të saj, por te stagnimi dhe mungesa e reformimit të vërtetë brenda opozitës, ku “kolltuku nuk përcillet me nder, por me trashëgimi të zymtë”.
Statusi i plotë:
Gjenerata Y ( Gjenerata ime)
E padukshmja që gjithmonë ka qenë aty!
Kampi opozitar, i mbërthyer prej vitesh në modele të konsumuar dhe strategji makiaveliste, ka ndërtuar një sistem që prodhon “produkte politike” pa asnjë lidhje me meritokracinë.
Dhe sot, ky sistem po shfaq pasojat më të rënda pikërisht mbi “Gjeneratën Y”– një brez i përgatitur, lojal ndaj vlerave, dhe gjithmonë i gatshëm për të kontribuar, por që sistematikisht përjashtohet nga loja dhe nga fronti i luftës.
“Gjenerata X” edhe pse pluskon në ujëra të turbullta të një ndërgjegjeje të mjegullt, nuk ka arritur të krijojë një raport besueshmërie me brezin që është rritur duke i parë, ndjekur dhe mbështetur.
Një brez që nuk kërkoi asgjë në këmbim, por sot shpërblehet me indiferencë.
Tragjedia është e dyfishtë: jo vetëm që Gjenerata Y lihet jashtë, por edhe “Gjenerata Z”që po “përgatitet” nga po të njëjtët emra që nuk duan të lëshojnë karrigen, rrezikon të bëhet kopja më e keqe e tyre.
Dhe kështu, kolltuku nuk përcillet me nder, por me trashëgimi të zymtë.
