Ekskluzive nga Timoni.al
Zyrtarë të lartë të Bashkimit Europian, në Bruksel dhe në Tiranë, i kanë dhënë një ultimatum të qartë kryeministrit Edi Rama, shkarkimin urgjent të zv.kryeministres Belinda Balluku pohojnë burime për portalin Timoni.al
Kjo kërkesë vjen pas zhvillimeve të fundit në drejtësi, ku GJKKO ka urdhëruar pezullimin nga detyra të disa zyrtarëve të lartë, përfshirë Berin dhe Ballukun, në kuadër të hetimeve për aferën korruptive të Tunelit të Llogarasë dhe lotin 4 të Unazës së Re.
Vendimi i GJKKO-së për pezullimin, i lidhur me dyshime të rënda për abuzime, favorizime dhe shkelje të procedurave në projekte strategjike me vlera të larta, ka vënë në alarm institucionet europiane. Brukseli ka kërkuar transparencë dhe përgjegjësi të menjëhershme.
Megjithatë, Edi Rama ka zgjedhur të mos bindet ndaj presionit të BE, duke vazhduar të mbrojë Ballukun. Sipas burimeve të besueshme nga kryeministria, shumë nga firmat e nënshkruara nga Balluku në projektet e mëdha janë bërë “në emër të Ramës”, ndaj shkarkimi i saj do të hapte një zinxhir përgjegjësish që prekin drejtpërdrejt vetë kryeministrin.
Në të njëjtën kohë, qeveria ka aktivizuar “ekspertët televizivë”, të cilët promovojnë narrativën se pezullimi nga GJKKO apo ndërhyrjet e SPAK “nuk bien ndesh me standardet europiane” dhe se Strasburgu “nuk e konsideron të paligjshme” pezullimin e një ministre nën hetim.
Kjo lëvizje propagande shihet si tentativë për të zbutur presionin dhe për të fituar kohë.
Por qëndrimi i Brukselit është i prerë:
Shqipëria nuk mund të ecë drejt integrimit europian me ministra të pezulluar nga GJKKO dhe të lidhur me afera madhore korruptive si Tuneli i Llogarasë dhe loti 4 i Unazës së Re.
Ultimatumi është i qartë: Edi Rama duhet të shkarkojë Belinda Ballukun.
Nëse ky hap nuk merret, paralajmërohen përkeqësim marrëdhëniesh, bllokime kapitujsh dhe presion i shtuar diplomatik ndaj qeverisë shqiptare.
