Në vitin 1903, punëtorët britanikë dhe portugezë themeluan në Porto klubin Boavista, i njohur për fanelën e tij ikonike me kuadrata bardhezi. Pas 122 vitesh histori, Boavista, e njohur si “Panterat”, përballet me një moment kritik. Sezonin e kaluar, skuadra e mbylli kampionatin në vendin e fundit dhe, për shkak të problemeve financiare të theksuara dhe proceseve gjyqësore për korrupsion, i është mohuar regjistrimi në divizionet e dytë, të tretë dhe të katërt të futbollit portugaz.
Situata është bërë kaq serioze sa administratori i klubit ka kërkuar formalisht likuidimin e Boavistës, duke theksuar paaftësinë për të zgjidhur problemet financiare. Megjithatë, drejtuesit e klubit insistojnë se ky proces nuk do të çojë në zhdukje përfundimtare, pasi klubi ka marrë dritën jeshile për një plan ekonomik shpëtimtar që mund të sigurojë mbijeteshën e tij.
Data kritike do të jetë 16 dhjetori, kur kreditorët do të vendosin për vlefshmërinë e këtij plani. Nëse plani refuzohet, Boavista do të ndalojë së ekzistuari pas më shumë se një shekulli. Situata dramatike e skuadrës, që ishte kampione e fundit para dominimit të Benfica, Porto dhe Sporting, të kujton raste të ngjashme në futbollin evropian, si ai i Bordeaux në Francë dhe Brescia në Itali, duke treguar se as klubet më historike nuk janë të imunizuara ndaj kolapsit financiar.
Boavista, një nga pesë skuadrat që kanë fituar titullin e kampionatit portuguez dhe kanë luajtur në Ligën e Kampioneve, po përballet me rrezikun e humbjes së identitetit të saj pas një periudhe të lavdishme. Historiku i saj dhe e kaluara e lavdishme e bëjnë këtë situatë edhe më tronditëse për tifozët dhe sportin në përgjithësi.
