Joaquin Guzman Lopez, djali i Joaquin “El Chapo” Guzman, bosi i drogës meksikan të arrestuar, planifikon të deklarohet fajtor në një gjykatë amerikane, sipas dokumenteve të fundit të gjykatës. Vëllai i tij, Ovidio Guzman, u deklarua fajtor në korrik për konspiracion në trafik droge dhe dy akuza lidhur me pjesëmarrjen në një organizatë kriminale. Ai pranoi se bashkë me tre vëllezërit e tij, të njohur si “Los Chapitos”, kishin marrë përsipër operacionet e babait të tyre, i cili po vuante dënimin me burgim të përjetshëm në Kolorados.
Në korrik 2024, Joaquín Guzmán López kishte deklaruar pafajësi ndaj akuzave për trafik droge, pastrim parash dhe posedim armësh. Megjithatë, dokumentet e reja tregojnë se ai synon të ndryshojë këtë deklaratë në gjykatën federale në Çikago. Ai u arrestua në korrik 2024, sapo mbërriti në Teksas me një avion privat, duke e shoqëruar Ismael “El Mayo” Zambada, një nga bashkëthemeluesit e kartelit Sinaloa.
Zambada pretendoi se ishte mashtruar në lidhje me udhëtimin e tij dhe se ishte rrëmbyer nga Guzmán López për t’u çuar në Shtetet e Bashkuara. Kjo ngjarje solli përplasje të ashpra brenda kartelit Sinaloa, ndërsa dy fraksione, ata që mbështesin vëllezërit Guzmán dhe ata që janë besnikë ndaj Zambadës, përjetuan konflikte me pasoja të rënda, duke rezultuar në rreth 1,200 të vdekur dhe 1,400 të zhdukur.
Shtetet e Bashkuara akuzojnë kartelin Sinaloa për trafikimin e fentanilit, një opioid sintetik që është shkaktari kryesor i dhjetëra mijëra vdekjeve në vitet e fundit. Aktivitetet e kartelit kanë tërhequr vemendjen e autoriteteve amerikane, për shkak të rreziqeve të larta që sjellin për shëndetin publik. Tashmë, me nismat e reja të Guzmán López për t’u deklaruar fajtor, situata brenda kartelit dhe efektet e tij në tregun e drogës përballen me një zhvillim të ri.
