Top Channel ka zbuluar detajet nga dosja hetimore e SPAK, e cila çoi në arrestimin e një grupi të trafikut të drogës që lidhte Amerikën Latine me Shqipërinë dhe Italinë, duke përfshirë mbi 1.3 ton kokainë. Një nga të arrestuarit është oficeri i Antiterrorit, Igli Haxhiaj, i cili akuzohet për dhënie informacioni të klasifikuar në këmbim të parave.
Në dosje, janë zbardhur biseda të Haxhiajt me individë të tjerë në platformën e komunikimit SkyECC, ku ai bisedonte rreth tregtisë së lëndëve narkotike. Bisedat dokumentojnë negociata për çmime dhe cilësinë e drogës, përfshirë detaje të hollësishme rreth mënyrës se si do të transportohej mala.
Pjesë të rëndësishme nga këto biseda datojnë në periudha të ndryshme, duke filluar nga marsi 2021 deri në dhjetor 2020. Haxhiaj diskutohet të ketë kërkuar informacion mbi disponibilitetin dhe cmimin e kokainës nga persona të tjerë, gjithashtu duke shkëmbyer foto të lëndëve në fjalë. Ai është përfshirë në biseda për të arrirë marrëveshje për blerjen e drogës dhe për informacion mbi transportin e saj nga Hollanda në Shqipëri.
Dyshimet për Haxhiaj përfshijnë korrupsion, shpërdorim detyre dhe nxjerrje të sekretit hetimor. Ndërkohë, tre persona të tjerë, Asti Llupi, Altin Shehaj dhe Erald Salla, janë arrestuar dhe pritet të ekstradohen drejt Italisë.
Gjykata e Breshias ka lëshuar 24 masa sigurie të lidhura me këtë hetim, prej të cilave 10 janë ekzekutuar në Itali, dhe 3 në Shqipëri. Disa të tjerë dyshohet se janë fshehur në vend. Kokaina e kapur transportohej nëpërmjet rrugëve detare nga Amerika e Jugut në Europën veriore, për të vijuar më pas rrugën tokësore, e fshehur në kamionë dhe autobusë, drejtuar për në 6 bazat që ishin nën kontrollin e shqiptarëve në Itali.
