Një kontroll rutinë i Autoritetit Kombëtar të Ushqimit (AKU) në tregun e Tiranës ka zbuluar se mandarina të mbushura me pesticide kanë përfunduar pa pengesë në tryezat e qytetarëve.
Analizat e kryera nga Instituti i Sigurisë Ushqimore dhe Veterinarisë (ISUV) konfirmuan praninë mbi normë të insekticidit Pirimiphos-methyl, një substancë që përdoret për mbrojtjen e frutave, por që në këtë rast përbën rrezik të drejtpërdrejtë për shëndetin e konsumatorëve.
Burime për “Ora News” bënë me dije se sapo u zbuluan rezultatet, AKU urdhëroi tërheqjen e produktit nga tregu.
Megjithatë, ndërhyrja erdhi shumë vonë: nga 700 kilogramë mandarina të kontaminuara, 660 kg ishin konsumuar nga qytetarët përpara se të binte alarmi, ndërsa vetëm 40 kg u bllokuan nga inspektorët.
Situata bëhet edhe më absurde kur AKU pranon se mandarinat janë prodhim vendas, por nuk di të thotë nga kush janë blerë. Furnizuesi nuk ka paraqitur faturë, nuk ka dokument origjine dhe sistemi i gjurmueshmërisë i cili është detyrim ligjor, mungon.
Për pasojë, institucioni gjobiti subjektin tregtar, por mbeti pa asnjë pistë për burimin e produktit të rrezikshëm.
