Mentor Mustafaraj ka depozituar një kallëzim penal shtesë pranë SPAK, i cili i bashkëngjitet procedimit penal nr. 125 të vitit 2020. Kallëzimi i ri përmban akuza të zgjeruara dhe kërkesa konkrete për hetime më të thelluara ndaj ish-gjyqtarit të Gjykatës së Apelit Tiranë, Alaudin Malaj, si dhe ndaj personave të tjerë të lidhur me të, ndër ta Brunilda Mersini dhe Genc Mersini.
Sipas Mustafarajt, ekzistojnë dyshime të forta se Malaj ka vepruar si organizator i një grupi të strukturuar kriminal, i cili përmes ndërtimeve të paligjshme, aktiviteteve tregtare të kryera në emër të disa shoqërive dhe vendimmarrjeve të dyshuara korruptive, ka siguruar të ardhura me burim të parregullt. Mustafaraj, i cili deklaron se është një nga viktimat direkte të kësaj skeme, kërkon që ndaj të kallëzuarve të merren masa shtrënguese për të shmangur ndikimin e tyre në provat dhe në procesin hetimor.
Kërkesa për masa sigurie dhe sekuestrim të pasurive
Në kallëzim, Mustafaraj kërkon vendosjen e masave të sigurimit personal ndaj të kallëzuarve, duke argumentuar se ekziston rrezik real që ata të dëmtojnë provat ose të vijojnë veprimtaritë e dyshuara kriminale. Kërkesa lidhet drejtpërdrejt me vendimin nr. 1648, datë 08.02.2022, “Për legalizimin e ndërtimit pa leje” në ASHK Vlorë, për të cilin kallëzuesi pretendon se është produkt i një procesi të parregullt, të mbështetur në dokumente teknike të manipuluara.
Mes kërkesave kryesore për sekuestrim janë:
- Pasuritë e shoqërisë “Rigers Konstruksion” shpk., që sipas Mustafarajt ka përfituar legalizim të një ndërtimi të paligjshëm në kundërshtim me vendimet e Gjykatës së Lartë.
- Pasuritë e Brunilda dhe Genc Mersinit, të lidhura me kontratën e sipërmarrjes së apartamenteve, por edhe pasuri të tjera që dyshohet se janë kaluar në emër të fëmijëve të tyre.
- Pasuritë e luajtshme dhe të paluajtshme të të gjithë të kallëzuarve, për shkak se, sipas kallëzuesit, ekzistojnë dyshime të arsyeshme se ato janë përfituar përmes korrupsionit dhe veprimtarive të tjera kriminale.
Dyshime për një grup të strukturuar kriminal
Në kallëzimin e dorëzuar, Mustafaraj paraqet një listë të gjerë veprash penale që ai mendon se janë konsumuar nga të kallëzuarit. Këtu përfshihen:
- Korrupsion aktiv dhe pasiv
- Pastrim parash
- Shkelja e barazisë në tendera dhe ankande publike
- Mashtrim dhe ndërtim pa leje
- Shtrëngim me dhunë për dhënie pasurie
- Shpërdorim detyre
- Fshehje të ardhurash
- Organizim dhe pjesëmarrje në grup të strukturuar kriminal
Aktiviteti kriminal i dyshuar, sipas Mustafarajt, është kryer përmes disa shoqërive të kontrolluara nga Alaudin Malaj, përfshirë “Rigers Konstruksion” shpk, “Alden Medical” shpk, “The A Investment” shpk, “Malaj & Associates Law Firm”, dhe “Mebrand” shpk., të cilat pretendohet se janë përdorur për pastrimin e të ardhurave të përfituara në mënyrë të paligjshme.
Përplasja për truallin dhe vendimet e Gjykatës së Lartë
Në kallëzimin e tij, Mustafaraj risjell në vëmendje konfliktin për pronësinë e një trualli në Vlorë, ku ai është bashkëpronar dhe ku Malaj, sipas tij, ka ndërtuar duke mos i njohur pjesën e tij të ligjshme. Ai thekson se pavarësisht vendimit nr. 594, datë 09.12.2016, dhe vendimit 594/1, datë 09.05.2019 të Gjykatës së Lartë, që pezullonin veprimet përmbarimore dhe ekzekutimin e vendimeve më të hershme, shoqëria “Rigers Konstruksion” ka vazhduar ndërhyrjet dhe transaksionet e ndaluara, duke kaluar pasuri edhe në favor të Brunilda dhe Genc Mersinit.
Më tej, Mustafaraj nënvizon se përpjekjet e shoqërisë për të revokuar vendimet e pezullimit janë rrëzuar disa herë nga Gjykata e Lartë, përfshirë vendimin nr. 77204-00140-00-2024, datë 26.12.2024. Ndërkohë, me vendimin e datës 05.02.2025, Gjykata e Lartë ka prishur vendimin nr. 692 të Gjykatës së Apelit Vlorë dhe ka kërkuar që çështja të rishqyrtohet nga një trupë tjetër gjykuese.
Sipas Mustafarajt, ky zhvillim tregon qartë se proceset gjyqësore të mëparshme kanë qenë të cenuara nga ndikimi dhe veprimet e personave të kallëzuar.
“Veprimtari kriminale e vazhdueshme”
Kallëzuesi insiston se veprimtaria e dyshuar kriminale ka qenë e vazhdueshme dhe e organizuar, e mbështetur në abuzime administrative, veprime të paligjshme të zyrtarëve publikë dhe përdorimin e shoqërive private për të fshehur origjinën e të ardhurave. Ai deklaron se në ditët në vijim do të paraqesë prova dhe dokumente shtesë për të mbështetur akuzat e tij.
Në përfundim, Mentor Mustafaraj i kërkon prokurorisë që të marrë masa të menjëhershme, të hetojë të gjitha pistat e ngritura dhe të garantojë që asnjë nga të kallëzuarit të mos ketë mundësi të vazhdojë veprimtarinë e dyshuar kriminale apo të ndikojë në procesin e hetimit.
