SKOCI– Një shtetas shqiptar që vepronte si ndërmjetës për një grup të strukturuar kriminal në Skoci u dënua me pesë vjet burg, pasi gjykata e shpalli fajtor për rolin e tij në një operacion të gjerë kultivimi kanabisi me vlerë miliona paund.
Afrim Krasniqi, i cili kishte hyrë ilegalisht në Mbretërinë e Bashkuar dhe zotëronte njohuri më të mira të anglishtes se pjesëtarët e tjerë të grupit, u punësua nga banda për t’i bindur pronarët e shtëpive se ai ishte një qytetar italian që kërkonte strehim për familjen e tij. Përmes kësaj skeme, rrjeti kriminal arriti të siguronte një sërë pronash në Renfrewshire, Edinburgh, Penicuik, Aberdeen, Ayrshire dhe Angus, të cilat më pas u shndërruan në ferma kanabisi.
Hetimet zbuluan se trafiku i drogës arrinte një vlerë tregu prej 3.8 milionë paundësh, ndërsa policia arriti të lokalizonte Krasniqin në një adresë në Edinburg, ku u arrestua. Banorë të zonës në Aberdeen kishin raportuar më herët shqetësime të lidhura me disa prona, çka çoi oficerët të gjenin ambiente të përshtatura për kultivim kanabisi, si dhe manipulim të matësve të energjisë elektrike.
Në Gjykatën e Lartë në Glasgow, ai u dënua pasi më parë kishte pranuar fajësinë për përfshirje në furnizimin e drogës së klasit B gjatë periudhës mars 2021 – shtator 2023, në prag të një gjyqi të planifikuar 15-ditor në Edinburg.
Lord Arthurson e përshkroi të pandehurin – i cili kishte lënë Shqipërinë në vitin 2016 – si pjesë të një “ndërmarrjeje kriminale në shkallë të gjerë dhe të planifikuar me kujdes”. Gjykatësi vendosi të ulte dënimin nga gjashtë në pesë vjet, për shkak të pranimit të fajësisë.
Prokurori David McLean KC kishte deklaruar më herët se Krasniqi kishte “përfshirje” në disa prej pronave, pasi kishte përdorur dokumente identiteti të falsifikuara për t’i marrë ato me qira. Ai gjithashtu rezultonte i lidhur me kultivime të tjera në zona të ndryshme, përfshirë St Andrews dhe Angus.
Në mbyllje të seancës, avokati mbrojtës Iain McSporran KC theksoi se: “Roli i tij ishte në thelb dikush që kishte një njohuri më të mirë të anglishtes sesa disa zotërinj të tjerë shqiptarë, të cilët ishin lëvizësit kryesorë.
“Ai nuk kishte asnjë rol përtej kësaj, asnjë rol në kultivimin e drogës, por ishte i vetëdijshëm se po lehtësonte një sipërmarrje kriminale.
“Ai ishte në vështirësi financiare dhe mori vendimin krejtësisht të gabuar duke u përfshirë.”
“Ai luajti një rol në këtë dhe tani duhet të paguajë çmimin.”
