Dy alpinistë kanë humbur jetën gjatë një ngjitjeje në Aoraki (Mali Cook), majën më të lartë të Zelandës së Re, e njohur për rreziqet e saj dhe motin e paparashikueshëm. Ngjarja ndodhi në lartësinë 3,724 metra, si pjesë e një grupi prej katër personash që përpiqeshin të arrinin kulmin. Dy alpinistët e vdekur ishin ende të lidhur me parzmoren e ngjitjes kur trupat e tyre u gjetën nga ekipet e shpëtimit, pasi dy të tjerët që ishin pjesë e grupit i kishin kontaktuar shërbimet e emergjencës natën e kaluar. Ata u shpëtuan me helikopter në mëngjesin e së martës.
Mali Aoraki Cook ka një reputacion të keq për alpinistët, për shkak të terrenit të tij të ashpër, çarjeve të thella dhe kushteve atmosferike të paqëndrueshme. Identiteti i alpinistëve të vdekur nuk është bërë publik, por media lokale raporton se njëri prej tyre ishte një udhërrëfyes malor me njohje ndërkombëtare.
Ngjitjet fatale në Aoraki nuk janë një dukuri e re. Një vit më parë, tre alpinistë nga SHBA dhe Kanada u zhdukën gjatë një ngjitjeje dhe, pas një kërkimi të gjatë, shpallesin të vdekur, megjithatë trupat e tyre nuk janë gjetur ende për shkak të motit të keq që pengoi operacionet. Sipas klubit alpin ClimbNZ, dhjetëra njerëz kanë humbur jetën në këtë mal dhe është e zakonshme që çdo sezon ngjitjeje të ketë të paktën një viktimë, duke e bërë këtë ngjitje veçanërisht të rrezikshme për alpinistët e pa përvojë, por edhe për ata me eksperiencë.
Ngjarja ka risjellë në vëmendje rrezikshmërinë e ngjitjes në Aoraki, e cila vazhdon të jetë një destinacion atraktiv, por gjithashtu një sfidë për shumë alpinistë që e nisin këtë aventurë të vështirë.
