“Telegraph” ka publikuar një artikull për shqiptarin Dorjan Puka, i cili, sipas medias, po bën “karshillëk” me stilin e tij të jetesës luksoze, ndërkohë që përballet me deportimin në Shqipëri. 29-vjeçari është arrestuar dhe deportuar dy herë për vjedhje dhe u rikthye fshehurazi në Britani, ku ka shpenzuar vitin e kaluar duke tallur Ministrinë e Brendshme në TikTok me videot e tij luksoze.
Ministria e Brendshme ka pranuar se nuk mund ta dëbojë Pukën derisa të shqyrtohet plotësisht kërkesa e tij për azil, por theksoi se kriminelët e huaj nuk duhet të kenë “asnjë dyshim” për zbatimin e ligjit. Puka ka postuar videoklipe duke drejtuar një Lamborghini Urus V8, me vlerë 184,950 paund, si dhe një koleksion orësh që variojnë nga Rolex Day-Date deri në orë më të lira, me një vlerë totale prej 162,500 paund.
Ky zhvillim ndodh pas njoftimit të Sekretares së Brendshme, Shabana Mahmood, për masa të ashpra ndaj azilkërkuesve, duke përfshirë rishikimin e sistemit të apelimit për të përshpejtuar deportimet. Ajo po ashtu ka propozuar që azilkërkuesit me pasuri të tilla si makina të paguajnë për mbështetje.
Puka kishte filluar të fitojë famë në vitin 2016, kur u burgos për nëntë muaj për tentativën për të hyrë me forcë në një pronë. Ai arriti të shmangë deportimin dhe të rikthehej në Britani, ku vazhdoi të kryejë vjedhje. Pas një arrestimi tjetër, ai u burgos për tre vjet e gjysmë dhe u deportua në mars 2020. Pas një periudhe të shkurtër në Shqipëri, ai udhëtoi për në Gjermani, Belgjikë dhe Holandë, para se të rikthehej në Britani në dhjetor 2020.
Aktualisht, ai është duke pritur vendimin e gjykatës për kërkesën e tij për azil, pasi është nën mbikëqyrje të imigracionit që nga viti 2023. Puka vazhdon të postojë imazhe dhe video luksoze në rrjetet sociale, përfshirë pushime në plazhe dhe makina të shtrenjta. Ndërkohë, burimet e tij financiare mbeten shumë të paqarta, por ka raportime që sugjerojnë se jeton në një apartament luksoz në Londër.
