Prokuroria e Posaçme ka zgjeruar hetimet rreth një skeme të dyshuar përfitimi me vlerë dhjetëra milionë euro, ku të përfshirë janë ish-zyrtarë të lartë dhe persona të lidhur me Ministren e Infrastrukturës dhe Energjisë, Belinda Balluku. Në qendër të hetimeve është z. Cenoklosi, së bashku me kushëririn e tij, Spartak Kovaçi, ish-drejtor i ujësjellësit të Durrësit dhe gjithashtu një ish-vartës i ministres Balluku.
I ftuar në emisionin Task Force me Sonila Meçon, gazetari Julian Hoxhaj u shpreh se Prokuroria e Posaçme ka zgjeruar hetimet rreth një skeme të dyshuar përfitimi me vlerë dhjetëra milionë euro, ku të përfshirë janë ish-zyrtarë të lartë dhe persona të lidhur me Ministren e Infrastrukturës dhe Energjisë, Belinda Balluku. Në qendër të hetimeve është z. Cenoklosi së bashku me kushëririn e tij, Spartak Kovaçi, ish-drejtor i ujësjellësit të Durrësit dhe ish-vartës i ministres.
Hoxhaj tha se dyshohet që ata, duke shfrytëzuar lidhjet familjare dhe politike, kanë ngritur një rrjet kompanish në emër të familjarëve, përmes të cilave kanë përfituar mbi 37 milionë euro tendera publikë, leje ndërtimi për hotele dhe toka publike. Skema ka lidhje të drejtpërdrejtë edhe me fushatën elektorale të zgjedhjeve të 11 majit, kur institucione nën Ministrinë e Infrastrukturës u shpërngulën në Fier për të mbështetur fushatën.
Ai theksoi se ky model krijon një “rreth vicioz”, ku pasuritë publike përfundojnë te individë me fuqi politike dhe ekonomike, ndërsa qytetarët nuk përfitojnë nga fondet dhe pronat publike.
Pjesë nga deklarata:
Po unë mendoj që është një lajm i mirë, në fakt, që Prokuroria e Posaçme po heton në disa drejtime. Po. Ashtu siç duhej, në fakt, të kishte ndodhur shumë më herët, duhet të kishte ndodhur ndoshta edhe para fushatës elektorale të zgjedhjeve të 11 majit, sepse ne e kemi thënë shpesh në këtë studio që këta njerëz kanë qenë shtabe elektorale të mirëfillta. Po. E dinë të gjithë, po të shkosh në Fier të pyesësh qytetarët, e dinë shumë mirë se çfarë ndodhi. U shpërngulën të gjitha institucionet në varësi të zonjës Balluku, se të gjithë morën apartamente, morën, ëh, prenotuan dhoma hoteli për të bërë fushatën në Fier. Madje edhe vetë zonja Balluku, në atë kohë, ka pasur, në dijeninë time, një apartament në qytetin e Fierit, ku ka regjistruar edhe vendbanimin, të deklaruar te deklarata e pasurisë e vitit 2024.
Ndaj, fakti që sot po hetohet zoti Cenoklosi, mbi të cilin në fakt rëndojnë një seri akuzash, një seri, ëh, jo vetëm për ato që ne kemi denoncuar së fundi në emisionin Plugë për historinë e famshme të paneleve diellore, por edhe më herët, sepse po hetohet edhe dosja 5B e famshme, e cila lidhet pikërisht me zotin Cenoklosi dhe me kushëririn e tij, Spartak Kovaçi, edhe ky një ish-vartës i zonjës Balluku, si ish-drejtor i ujësjellësit të Durrësit.
Të dy së bashku, për shkak të lidhjeve familjare, por sigurisht atyre politike, kanë krijuar kompani, me emër të familjarëve të tyre, ëhë, të cilat sot kanë gjeneruar, në momentin që flasim, mbi 37 milionë euro tendera publik. Jo vetëm këto, por edhe leje ndërtimi për ndërtim hoteli apo benefite të tjera nga shteti. Pse kanë marrë edhe toka me qera, siç ishte rasti i paneleve fotovoltaike në qytetin e Fierit, në zonën e Topojës, që janë dhënë nga bashkia e Fierit.
Pra, prona publike, të cilat vihen në shërbim të njerëzve që kanë pushtet politik, dhe në përfundim qytetarët nuk përfitojnë asgjë. Pra, krijohet një rreth vicioz, një cikël i mbyllur, ku pasuritë publike përfundojnë pikërisht në duart e disa personave që kanë dhe fuqinë politike dhe fuqinë ekonomike, dhe në momentin e duhur thirren nën armë për t’i shërbyer qëllimit kryesor, pra mbajtjes në pushtet të Partisë Socialiste.
