Në Bruksel, me ftesë të Sekretarit të Përgjithshëm të NATO-s, Mark Rutte, janë mbledhur drejtuesit e shërbimeve të inteligjencës civile dhe ushtarake nga të gjitha vendet aleate. Mes delegatëve ishte edhe drejtoresha e SHISH, Vlora Hyseni. Ky takim i komiteteve CIC (Civilian Intelligence Committee) dhe MIC (Military Intelligence Committee) u zhvillua në një periudhë të rëndësishme për sigurinë euroatlantike dhe ka një peshë strategjike për Shqipërinë, duke u theksuar angazhimin e vendit në bashkëpunimin me aleatët e NATO-s.
Diskutimet përfshinë çështje të rëndësishme të sigurisë, si agresioni rus në Ukrainë, marrëdhëniet e Moskës me Kinën, Korenë e Veriut, Bjellorusinë dhe Iranin, si dhe të ardhmen e inteligjencës së NATO-s, me një fokus të veçantë në teknologjitë e reja. Rutte theksoi se lufta në Ukrainë ilustron se “siguria nuk është rajonale, por globale”, duke nënvizuar se shkëmbimi i informacionit mes aleatëve po ndodh më shpejt dhe më gjerësisht se kurrë më parë.
Takimet vjetore kanë si qëllim harmonizimin e politikave dhe strategjive të inteligjencës, duke forcuar mbështetje për planet dhe operacionet e NATO-s. Përveç seancave vjetore, komitetet mblidhen rregullisht gjatë vitit për të diskutuar çështje të tjera të sigurisë. Ky angazhim reflekton përkushtimin e NATO-s dhe vendeve anëtare për të adresuar sfidat e sigurisë në nivel global.
