Reshjet e dëborës kanë mbuluar pikën turistike të Lëpushës në Kelmend, duke krijuar një peizazh dimëror të mahnitshëm. Shtresa e borës ka zbardhur tërë zonën malore, e cila është e njohur për natyrën e saj të paprekur dhe bukuritë alpine.
Aktualisht, Lëpushë dhe Vermosh janë disa nga destinacionet më të kërkuara për ata që preferojnë dëborën, udhëtimet malore dhe pushimet në natyrë. Bujtinat në këto zona janë të gatshme për të pritur vizitorë, ndërkohë që rrugët që çojnë në këto atraksione raportohen të jenë kalueshme, pavarësisht kushteve të ftohta.
Vizitorët kanë mundësinë të shijojnë aktivitetet dimërore dhe të eksplorojnë bukuritë natyrore që ofron zona, duke e bërë këtë periudhë ideale për ata që kërkojnë aventura në mal.
